ಮೇ ತಿಂಗಳಿನಿಂದ 6.3 ಲಕ್ಷ ಮಂದಿಗೆ ಪೂರ್ಣ ಪಿಂಚಣಿ

Team Udayavani, Apr 29, 2020, 3:09 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಹೊಸದಿಲ್ಲಿ: 2008, ಸೆ.26ಕ್ಕಿಂತ ಮುಂಚೆ ನಿವೃತ್ತರಾಗಿ ಕಮ್ಯುಟೇಶನ್‌ ನಿಯಮದ ಲಾಭ ಪಡೆದವರು, ಮುಂದಿನ ತಿಂಗಳಿನಿಂದ ಪೂರ್ಣ ಪಿಂಚಣಿ ಪಡೆಯಲಿದ್ದಾರೆ.

ಇದರಿಂದ 6.3 ಲಕ್ಷ ನೌಕರರ ಭವಿಷ್ಯನಿಧಿ ಚಂದಾದಾರರಿಗೆ ಅನುಕೂಲವಾಗಲಿದೆ. ಆದರೆ ಸರ್ಕಾರಕ್ಕೆ 1,500 ಕೋಟಿ ರೂ. ಹೊರೆ ಬೀಳಲಿದೆ. ಈ ವರ್ಷ ಫೆ.20ರಂದು ಕೇಂದ್ರ ಸರ್ಕಾರ ಈ ಬಗ್ಗೆ ಆದೇಶ ಹೊರಡಿಸಿದ್ದನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು.

ಈ ಹಿಂದೆ ಭವಿಷ್ಯ ನಿಧಿ ಕಾನೂನು, ಉದ್ಯೋಗಿಗಳಿಗೆ ಒಂದು ಸೌಲಭ್ಯವನ್ನು ನೀಡಿತ್ತು. 2008,ಸೆ.26ಕ್ಕೆ ಮುನ್ನ ನಿವೃತ್ತರಾದವರು, ನಿವೃತ್ತಿಯ ವೇಳೆ ತಮ್ಮ ಒಟ್ಟು ಪಿಂಚಣಿಯಲ್ಲಿ 3ನೆಯ 1 ಭಾಗವನ್ನು ಒಂದೇ ಬಾರಿಗೆ ಪಡೆಯಬಹುದು. ಉಳಿದ ಎರಡು ಭಾಗವನ್ನು ಮಾಸಿಕ ಪಿಂಚಣಿಯಾಗಿ ಪಡೆಯಬಹುದು ಎನ್ನುವುದು ಆ ನಿಯಮ.

ಒಂದೇ ಬಾರಿಗೆ 1 ಭಾಗ ಹಣ ಪಡೆದವರಿಗೆ ಪಿಂಚಣಿ ಸಹಜವಾಗಿ ಕಡಿಮೆಯಾಗುತ್ತದೆ. ನೌಕರರ ಹಿತಕ್ಕಾಗಿ ಇತ್ತೀಚೆಗೆ ನಿಯಮವನ್ನು ಪರಿಷ್ಕರಿಸಿದ ಕೇಂದ್ರ, ಈ ಸೌಲಭ್ಯದಿಂದ ಲಾಭ ಪಡೆದವರು, ನಿವೃತ್ತರಾಗಿ 15 ವರ್ಷ ಕಳೆದಿದ್ದರೆ ಮತ್ತೆ ಪೂರ್ಣ ಪಿಂಚಣಿ ಪಡೆಯಲು ಅರ್ಹರಾಗುತ್ತಾರೆ ಎಂದು ತೀರ್ಮಾನಿಸಿತ್ತು.