ಗುಡ್ ನ್ಯೂಸ್:  ಚಿನ್ನ, ಬೆಳ್ಳಿ ಬೆಲೆಯಲ್ಲಿ ಸತತ ಇಳಿಕೆ: ಇಂದಿನ ಬೆಲೆ ವಿವರ ಇಲ್ಲಿದೆ…

Team Udayavani, Sep 30, 2020, 4:41 PM IST

ನವದೆಹಲಿ/ಬೆಂಗಳೂರು: ದೇಶದಲ್ಲಿ ಕಳೆದ ವಾರದಿಂದ ಸತತವಾಗಿ ಹಳದಿ ಲೋಹದ ಬೆಲೆಯಲ್ಲಿ ಇಳಿಕೆ ಕಂಡುಬಂದಿದ್ದು, ಇದೀಗ ಬುಧವಾರ (ಸೆಪ್ಟೆಂಬರ್ 30, 2020) ಚಿನ್ನದ ಬೆಲೆಯಲ್ಲಿ ಮತ್ತೆ 26 ರೂಪಾಯಿ ಇಳಿಕೆಯಾಗಿದೆ. ಬೆಳ್ಳಿ ಬೆಲೆಯಲ್ಲಿ 201 ರೂಪಾಯಿ ಇಳಿಕೆಯಾಗಿರುವುದಾಗಿ ವರದಿ ತಿಳಿಸಿದೆ.

ಚಿನ್ನದ ಮೇಲಿನ ಹೂಡಿಕೆಗಾಗಿ ಹೂಡಿಕೆದಾರರು ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯ ಮೊದಲ ಚರ್ಚೆಯ ಮೇಲೆ ನಿರೀಕ್ಷೆಯನ್ನಿಟ್ಟಿದ್ದಾರೆ. ಮೊದಲ ಚರ್ಚೆಯಲ್ಲಿಯೇ ಡೊನಾಲ್ಡ್ ಟ್ರಂಪ್ ಮತ್ತು ಡೆಮೋಕ್ರಟಿಕ್ ಪಕ್ಷದ ಅಧ್ಯಕ್ಷೀಯ ಅಭ್ಯರ್ಥಿ ಜೊಯ್ ಬಿಡೆನ್ ನಡುವೆ ಸಂಘರ್ಷ ಏರ್ಪಟ್ಟಿದ್ದು, ಮಾರುಕಟ್ಟೆ ಮೇಲೆ ಪರಿಣಾಮ ಬೀರಿರುವುದಾಗಿ ತಜ್ಞರು ವಿಶ್ಲೇಷಿಸಿದ್ದಾರೆ.

ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಅಕ್ಟೋಬರ್ ತಿಂಗಳ ಚಿನ್ನದ ಬೆಲೆ ಮಲ್ಟಿ ಕಮೋಡಿಟಿ ಎಕ್ಸ್ ಚೇಂಜ್ (ಎಂಸಿಎಕ್ಸ್) ಪ್ರಕಾರ ಹತ್ತು ಗ್ರಾಂ ಚಿನ್ನಕ್ಕೆ 50,681 ರೂಪಾಯಿ. ಇನ್ನು ಬೆಳ್ಳಿ ಬೆಲೆ ಕೆಜಿಗೆ 61,337 ರೂಪಾಯಿ ಆಗಲಿದೆ ಎಂದು ತಿಳಿಸಿದೆ. ದೇಶೀಯ ಮಾರುಕಟ್ಟೆಯಲ್ಲಿ ಹಳದಿ ಲೋಹ 26 ರೂಪಾಯಿ ಇಳಿಕೆಯಾಗಿದ್ದು, ಹತ್ತು ಗ್ರಾಂ ಚಿನ್ನಕ್ಕೆ 51, 398 ರೂಪಾಯಿ ಆಗಿರುವುದಾಗಿ ಹೇಳಿದೆ.

ಇದನ್ನೂ ಓದಿ:ಗುಡ್ ನ್ಯೂಸ್: 2018-19ನೇ ಸಾಲಿನ ವಾರ್ಷಿಕ ಜಿಎಸ್ ಟಿ ಪಾವತಿ ಅವಧಿ ಅ.31ರವರೆಗೆ ವಿಸ್ತರಣೆ

ದೇಶದ ಮಹಾನಗರಗಳಲ್ಲಿ ಚಿನ್ನ, ಬೆಳ್ಳಿ ದರ ಹೇಗಿದೆ?

ರಾಜಧಾನಿ ದಿಲ್ಲಿಯಲ್ಲಿ 22 ಕ್ಯಾರಟ್ ಚಿನ್ನಕ್ಕೆ(ಪ್ರತಿಹತ್ತು ಗ್ರಾಂ) 49, 200 ರೂಪಾಯಿ, 24 ಕ್ಯಾರಟ್ ಚಿನ್ನಕ್ಕೆ(ಪ್ರತಿ ಹತ್ತುಗ್ರಾಂ) 51,398 ರೂ. ಬೆಳ್ಳಿ ದರ ಕೆಜಿಗೆ 62, 442 ರೂಪಾಯಿ.

ಉದ್ಯಾನನಗರಿ ಬೆಂಗಳೂರಿನಲ್ಲಿ 22 ಕ್ಯಾರಟ್ ಚಿನ್ನಕ್ಕೆ 47,680 ರೂಪಾಯಿ, 24 ಕ್ಯಾರಟ್ ಚಿನ್ನಕ್ಕೆ 52,010 ರೂಪಾಯಿ. ಬೆಳ್ಳಿ ಕೆಜಿಗೆ 60,700 ರೂಪಾಯಿ.

ಮುಂಬೈನಲ್ಲಿ 22 ಕ್ಯಾರಟ್ ಚಿನ್ನಕ್ಕೆ 48,950 ರೂಪಾಯಿ, 24 ಕ್ಯಾರಟ್ ಚಿನ್ನಕ್ಕೆ 49,950 ರೂಪಾಯಿ. ಬೆಳ್ಳಿ ಬೆಲೆ ಕೆಜಿಗೆ 60,700 ರೂಪಾಯಿ.

ಚೆನ್ನೈನಲ್ಲಿ 22 ಕ್ಯಾರಟ್ ಚಿನ್ನಕ್ಕೆ 48,340 ರೂಪಾಯಿ, 24 ಕ್ಯಾರಟ್ ಚಿನ್ನಕ್ಕೆ 52,730 ರೂಪಾಯಿ, ಬೆಳ್ಳಿ ಒಂದು ಕೆಜಿಗೆ 60,700 ರೂಪಾಯಿ.