ನಗದು ವಹಿವಾಟು ಮಿತಿ 3ರಿಂದ 2 ಲಕ್ಷ ರೂ.ಗೆ ಇಳಿಸಲು ಕೇಂದ್ರದ ಪ್ರಸ್ತಾಪ

Team Udayavani, Mar 21, 2017, 7:49 PM IST

ಹೊಸದಿಲ್ಲಿ : ಕೇಂದ್ರ ಸರಕಾರಕಪ್ಪು ಹಣದ ವಿರುದ್ಧ ತನ್ನ ಹೋರಾಟವನ್ನು ಮುಂದುವರಿಸಿರು ವಂತೆಯೇ, ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇತ್ಲಿ ಅವರಿಂದು ಬಜೆಟ್‌ನಲ್ಲಿ ಪ್ರಸ್ತಾವಿಸಿದ್ದ ನಗದು ವಹಿವಾಟಿನ 3 ಲಕ್ಷ ರೂ.ಗಳ ಗರಿಷ್ಠ ಮಿತಿಯನ್ನು 2 ಲಕ್ಷ ರೂ.ಗೆ ಇಳಿಸುವ ಪ್ರಸ್ತಾವವನ್ನು ಮುಂದಿಟ್ಟಿದ್ದಾರೆ. 

ಬಜೆಟ್‌ನಲ್ಲಿ ಪ್ರಸ್ತಾವಿಸಿದಂತೆ ನಗದು ವಹಿವಾಟಿನ 3 ಲಕ್ಷ ರೂ.ಗಳ ಗರಿಷ್ಠ ಮಿತಿಯು ಇದೇ ಎಪ್ರಿಲ್‌ 1ರಿಂದ ಜಾರಿಗೆ ಬರುವುದಿತ್ತು. ಈ ಮಿತಿಯನ್ನು 2 ಲಕ್ಷ ರೂ.ಗಳಿಗೆ ಇಳಿಸುವ ಪ್ರಸ್ತಾವವನ್ನು ಜೇತ್ಲಿ ಅವರಿಂದು ಸರಕಾರದ ಮುಂದಿರಿಸಿದರು. 

ಕಪ್ಪು ಹಣವನ್ನು ನಿಯಂತ್ರಿಸುವ ನಿಟ್ಟಿನಲ್ಲಿ ವಿಶೇಷ ತನಿಖಾ ತಂಡವು ಗರಿಷ್ಠ ನಗದು ವಹಿವಾಟಿಗೆ 3 ಲಕ್ಷ ರೂ.ಗಳ ಮಿತಿ ಹೇರಬೇಕೆಂದು ಶಿಫಾರಸು ಮಾಡಿತ್ತು. ಈ ವಿಶೇಷ ತನಿಖಾ ತಂಡವನ್ನು ಸುಪ್ರೀಂ ಕೋರ್ಟ್‌ ರೂಪಿಸಿತ್ತು. ಅದರ ಶಿಫಾರಸನ್ನು ಜೇತ್ಲಿ ಅವರು 2017-18ರ ಬಜೆಟ್‌ನಲ್ಲಿ ನಮೂದಿಸಿದ್ದರು. 

ನಿವೃತ್ತ ಜಸ್ಟಿಸ್‌ ಎಂ ಬಿ ಶಾ ನೇತೃತ್ವದ ವಿಶೇಷ ತನಿಖಾ ತಂಡವು ಕಳೆದ ವರ್ಷ ಜುಲೈಯಲ್ಲಿ ಕಪ್ಪು ಹಣವನ್ನು ನಿಯಂತ್ರಿಸುವ ನಿಟ್ಟಿನಲ್ಲಿ ತನ್ನ ಐದನೇ ವರದಿಯನ್ನು ಸಲ್ಲಿಸಿತ್ತು.