ನೂತನ ಇ- ಕಾಮರ್ಸ್‌ ನೀತಿಯಿಂದ ಸ್ವದೇಶಿ ಕಂಪನಿಗಳಿಗೆ ವರದಾನ

Team Udayavani, Jul 7, 2020, 12:51 PM IST

ನವದೆಹಲಿ: ಕೇಂದ್ರ ಸರ್ಕಾರ ಜಾರಿ ಮಾಡಲು ಹೊರಟಿರುವ ನೂತನ ಇ- ಕಾಮರ್ಸ್‌ ನೀತಿ ಅಮೆಜಾನ್‌.ಕಾಂ ಇಂಕ್‌, ಆಲ್ಫಾಬೆಟ್‌ ಇಂಕ್‌ ಹಾಗೂ ಫೇಸ್‌ಬುಕ್‌ ಇಂಕ್‌ನಂಥ ಸಂಸ್ಥೆಗಳಿಗೆ ತೀವ್ರ ಹೊಡೆತ ನೀಡಲಿದೆ. ಸ್ಥಳೀಯ ಸ್ಟಾರ್ಟ್‌ಅಪ್‌ಗಳನ್ನು ಈ ನೀತಿ ಕೈಹಿಡಿಯಲಿದೆ. ನೂತನ ನೀತಿ ಅನ್ವಯ, ವಿದೇಶಿ ಇ-ಕಾಮರ್ಸ್‌
ಕಂಪನಿಗಳು ಡೇಟಾವನ್ನು ಹೇಗೆ ನಿರ್ವಹಿಸುತ್ತಿವೆ ಎನ್ನುವುದರ ಕುರಿತು ಸರ್ಕಾರ ಮೇಲ್ವಿಚಾರಣೆ ನಡೆಸಬಹುದು. ಈ ಮೂಲಕ ಅಮೆಜಾನ್‌, ಆಲ್ಫಾ ಬೆಟ್‌, ಫೇಸ್‌ಬುಕ್‌ ಇಂಕ್‌ನಂಥ ದೈತ್ಯ ಸಂಸ್ಥೆಗಳ ಪ್ರಾಬಲ್ಯ ತಗ್ಗಿಸುವ ಉದ್ದೇಶವನ್ನು ನೀತಿ ಹೊಂದಿದೆ.

ಹೇಗೆ ಸಾಧ್ಯ?: ನೂತನ ಇ- ಕಾಮರ್ಸ್‌ ಕರಡು ನೀತಿಯ ಪ್ರಕಾರ, ಯಾವುದೇ ವಿದೇಶಿ ಇ- ಕಾಮರ್ಸ್‌ ಸಂಸ್ಥೆಗಳು 72 ಗಂಟೆಯೊಳಗೆ ಸರ್ಕಾರಕ್ಕೆ ಡೇಟಾವನ್ನು ಲಭ್ಯವಾಗುವಂತೆ ನೋಡಿಕೊಳ್ಳಬೇಕು. ರಾಷ್ಟ್ರೀಯ ಭದ್ರತೆ, ತೆರಿಗೆ ಹಾಗೂ ಕಾನೂನು ಸುರಕ್ಷತೆಗೆ ಸಂಬಂಧಿಸಿದಂತೆ ಸ್ಪಷ್ಟ ಮಾಹಿತಿ ಇರಬೇಕು. ಭಾರತದ ಗ್ರಾಹಕರ ಡೇಟಾಗಳನ್ನು ದೇಶದೊಳಗೇ ಸಂಗ್ರಹಿಸಿಟ್ಟುಕೊಳ್ಳಬೇಕು. ಇದರಿಂದಾಗಿ ವಿದೇಶಿ ಸಂಸ್ಥೆಗಳಿಗೆ ಭಾರತದಲ್ಲಿ ಹೆಚ್ಚೆಚ್ಚು ಡೇಟಾ ಸಂಗ್ರಹಣಾ ಕೇಂದ್ರಗಳನ್ನು ತೆರೆಯ ಬೇಕಾದ ಅನಿವಾರ್ಯತೆ ಎದುರಾಗುತ್ತದೆ. ಸಂಸ್ಥೆಗಳ ಮೂಲ ಕೋಡ್‌ಗಳು, ಕ್ರಮಾವಳಿಗಳನ್ನು ಯಾವಾಗ ಬೇಕಾದರೂ ಪರಿಶೀಲಿಸುವ ಹಕ್ಕನ್ನು ಸರ್ಕಾರ ಹೊಂದಿದೆ.

ಆಮದು ಮಾಡಿಕೊಂಡ ಯಾವುದೇ ಉತ್ಪನ್ನಗಳ ಮೇಲೂ ಮೂಲ ದೇಶದ ಹೆಸರನ್ನು ನಮೂದಿಸುವುದು ಕಡ್ಡಾಯವಾಗಿದೆ. ಉತ್ಪನ್ನ ಭಾರತದಲ್ಲಿ
ತಯಾರಾಗಿದ್ದರೆ ಅದನ್ನು ಸ್ಪಷ್ಟವಾಗಿ ನಮೂದಿಸ ಬೇಕು ಎಂದು ವಿತ್ತ ಸಚಿವಾಲಯ ಈ ನೀತಿಯಲ್ಲಿ ಸೂಚಿಸಿದೆ. ಈ ನಿಯಮಗಳು ಜಾರಿಯಾದರೆ ಚೀನೀ ಉತ್ಪನ್ನ ಸಂಸ್ಥೆಗಳಿಗೆ ಹೆಚ್ಚಿನ ಪ್ರಮಾಣದ ಹೊಡೆತ ಬೀಳಲಿದೆ.