ಮೂರನೇ ದಿನವೂ ಮುಂಬಯಿ ಶೇರು ಜಿಗಿತ: 116 ಅಂಕ ಏರಿಕೆ

Team Udayavani, Feb 22, 2017, 10:57 AM IST

ಮುಂಬಯಿ : ನಿರಂತರ ಮೂರನೇ ದಿನವೂ ಮುಂಬಯಿ ಶೇರು ಪೇಟೆಯಲ್ಲಿ ರಾಲಿ ಮುಂದುವರಿದಿದೆ. ಇಂದು ಬುಧವಾರ ಬೆಳಗ್ಗೆ 10.50ರ ಸುಮಾರಿಗೆ ಸೆನ್ಸೆಕ್ಸ್‌ 116.87 ಅಂಕಗಳ ಮುನ್ನಡೆಯೊಂದಿಗೆ 28,87.46 ಅಂಕಗಳ ಮಟ್ಟದಲ್ಲಿ ವ್ಯವಹಾರ ನಿರತವಾಗಿತ್ತು.

ಇದೇ ರೀತಿ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 32.55 ಅಂಕಗಳ ಮುನ್ನಡೆಯನ್ನು ಗಳಿಸಿ ದಿನದ ವಹಿವಾಟನ್ನು 8,940.40 ಅಂಕಗಳ ಮಟ್ಟಕ್ಕೆ ಒಯ್ಯುವಲ್ಲಿ ಸಫ‌ಲವಾಗಿದೆ.

ರಿಲಯನ್ಸ್‌ ಜಿಯೋ ಟ್ಯಾರಿಫ್ ಪ್ಲಾನ್‌ ಎಪ್ರಿಲ್‌ 1ರಿಂದ ಪ್ರಾರಂಭವಾಗುವುದೆಂದು ನಿನ್ನೆ ಮಂಗಳವಾರ ರಿಲಯನ್ಸ್‌ ಅಧ್ಯಕ್ಷ ಮುಕೇಶ್‌ ಅಂಬಾನಿ ಘೋಷಿಸಿದ ಪರಿಣಾಮವಾಗಿ ಇಂದು ರಿಲಯನ್ಸ್‌ ಇಂಡಸ್ಟ್ರೀಸ್‌ ಶೇರು ಶೇ.7ರಷ್ಟು  ನೆಗೆದಿದ್ದು  8 ವರ್ಷಗಳ ಎತ್ತರವನ್ನು ಅದು ತಲುಪಿರುವುದು ಗಮನಾರ್ಹವಾಗಿದೆ. ಆದರೆ ಇದೇ ವೇಳೆ ಐಟಿ ಶೇರುಗಳು ಹಿನ್ನಡೆಗೆ ಗುರಿಯಾಗಿವೆ. 

ಎಕ್ಸಿಸ್‌ ಬ್ಯಾಂಕ್‌ ಶೇರುಗಳು ಇಂದು ಶೇ.2.5ರಷ್ಟು ಏರಿವೆ. ಕೋಟಕ್‌ ಮಹೀಂದ್ರ ಬ್ಯಾಂಕ್‌ ಜತೆಗಿನ ವಿಲಯನ ಸಂಭಾವ್ಯತೆಯ ವದಂತಿಗಳನ್ನು ನಿನ್ನೆ ಎಕ್ಸಿಸ್‌ ಬ್ಯಾಂಕ್‌ ನಿರಾಕರಿಸಿತ್ತು. ಆದರೆ ಕೋಟಕ್‌ ಮಹೀಂದ್ರ ಬ್ಯಾಂಕ್‌, ಇತರ ಹಲವು ಪ್ರಮುಖ ಖಾಸಗಿ ಬ್ಯಾಂಕುಗಳ ಹಾಗೆ, ಸರಕಾರದ ಕೈಯಲ್ಲಿರುವ ಶೇರುಗಳನ್ನು ತನ್ನದಾಗಿಸಿಕೊಳ್ಳುವ ಆಸಕ್ತಿಯನ್ನು ತೋರಿರುವುದು ಖಚಿತವಾಗಿದೆ. 

ಟಿಸಿಎಸ್‌ ಮತ್ತು ಇನ್‌ಫೋಸಿಸ್‌ ಶೇರುಗಳು ಇಂದು ಶೇ.1 ರಿಂದ ಶೇ.1.5ರಷ್ಟು ಕುಸಿದವು.