ಕಳೆದ ವರ್ಷ ನ್ಯಾನೋ ಕಾರು ಉತ್ಪಾದನೆ ಶೂನ್ಯ; 1 ಕಾರು ಮಾರಾಟ

Team Udayavani, Jan 6, 2020, 10:44 PM IST

ನವದೆಹಲಿ: ಕಳೆದ ವರ್ಷ ಒಂದೇ ಒಂದು ಟಾಟಾ ನ್ಯಾನೋ ಕಾರು ಉತ್ಪಾದನೆಯಾಗಿಲ್ಲ. ಆದರೆ ದೇಶದಲ್ಲಿ ಒಂದು ಕಾರು ಮಾತ್ರ ಮಾರಾಟವಾಗಿದೆ. ಅದೂ ಫೆಬ್ರವರಿ ತಿಂಗಳಲ್ಲಿ ಮಾತ್ರ. ಬಾಂಬೆ ಸ್ಟಾಕ್‌ಎಕ್ಸ್‌ಚೇಂಜ್‌ಗೆ ಸಲ್ಲಿಸಿರುವ ಲಿಖೀತ ಹೇಳಿಕೆ ಪ್ರಕಾರ “2019ರ ಡಿಸೆಂಬರ್‌ನಲ್ಲಿ ಒಂದೇ ಒಂದು ಟಾಟಾ ನ್ಯಾನೋ ಕಾರನ್ನು ತಯಾರಿಸಲಾಗಿಲ್ಲ. ಆದರೆ 2018ರ ಡಿಸೆಂಬರ್‌ನಲ್ಲಿ 82 ಕಾರುಗಳನ್ನು ಉತ್ಪಾದಿಸಿ, 88 ಕಾರುಗಳನ್ನು ಮಾರಾಟ ಮಾಡಲಾಗಿತ್ತು. 2019ರ ನವೆಂಬರ್‌ನಲ್ಲಿಯೂ ಶೂನ್ಯ ಸಾಧನೆ ಮಾಡಲಾಗಿತ್ತು. 2018ರ ಅದೇ ಅವಧಿಯಲ್ಲಿ 66 ಕಾರುಗಳನ್ನು ಉತ್ಪಾದಿಸಿ, 77 ಕಾರುಗಳನ್ನು ಮಾರಾಟ ಮಾಡಲಾಗಿತ್ತು’ ಎಂದು ತಿಳಿಸಲಾಗಿದೆ.

ಅಕ್ಟೋಬರ್‌ನಲ್ಲಿಯೂ ಯಾವುದೇ ಕಾರುಗಳನ್ನು ತಯಾರಿಸಲಾಗಿಲ್ಲ. ಇದರ ಹೊರತಾಗಿಯೂ ನ್ಯಾನೋ ಕಾರ್‌ನ ಉತ್ಪಾದನೆ ಸ್ಥಗಿತಗೊಳಿಸುವ ಬಗ್ಗೆ ನಿರ್ಧಾರವನ್ನು ಇದುವರೆಗೆ ಪ್ರಕಟಿಸಿಲ್ಲ. 1 ಲಕ್ಷ ರೂ. ಕಾರು ಎಂಬ ಹೆಗ್ಗಳಿಕೆಯೊಂದಿಗೆ 2008ರ ಜನವರಿಯಲ್ಲಿ ಅದನ್ನು ಅನಾವರಣಗೊಳಿಸಲಾಗಿತ್ತು. 2009ರಲ್ಲಿ ಅದನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗಿತ್ತು.