ಪ್ರಯಾಣಿಕರ ವಾಹನ ಮಾರಾಟದಲ್ಲಿ ಶೇ.0.28 ಹೆಚ್ಚಳ : ಸಿಯಾಮ್ ವರದಿ

Team Udayavani, Nov 11, 2019, 5:05 PM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಹೊಸದಿಲ್ಲಿ: ಕಳೆದ ಕೆಲ ತಿಂಗಳಿಂದ ಅಟೋಮೊಬೈಲ್ ಕ್ಷೇತ್ರದಲ್ಲಿ ಏರಿಳಿತ ಕಂಡು ಬರುತ್ತಿದ್ದು, ಹೇಳಿಕೊಳ್ಳುವಂತಹ ಸಾಧನೆ ಏನು ಆಗಿಲ್ಲ. ಆರ್ಥಿಕ ಹಿಂಜರಿತದ ಬಿಸಿ ವಾಹನ ಮಾರಾಟದ ಮೇಲೂ ಪರಿಣಾಮ ಬೀರಿದೆ. ಕಳೆದ ತಿಂಗಳಿನ ಮಾರಾಟ ಸೂಚ್ಯಂಕದಲ್ಲಿ ಶೇ.12.76 ರಷ್ಟು ಇಳಿಕೆ ಕಂಡುಬಂದಿದ್ದು, ಪ್ರಯಾಣಿಕರ ವಾಹನ ಮಾರಾಟದಲ್ಲಿ ಕೇವಲ ಶೇ.0.28 ರಷ್ಟು ಹೆಚ್ಚಳವಾಗಿದೆ ಎಂದು ಉದ್ಯಮ ಸಂಸ್ಥೆ ಭಾರತೀಯ ಅಟೊಮೊಬೈಲ್ ತಯಾರಿಕಾ ಒಕ್ಕೂಟ (SIAM) ತಿಳಿಸಿದೆ.

ಈ ಸಂಸ್ಥೆ ಸೋಮವಾರ ಬಿಡುಗಡೆಗೊಳಿಸಿರುವ ವರದಿಯಲ್ಲಿ ಉಲ್ಲೇಖಿಸಿರುವಂತೆ, ಕಳೆದ ವರ್ಷದ ಅಕ್ಟೋಬರ್ ತಿಂಗಳಿನಲ್ಲಿ 2,85,027 ಪ್ರಯಾಣಿಕರ ವಾಹನಗಳು ಮಾರಾಟವಾಗಿದ್ದರೆ ಈ ವರ್ಷ ಅಕ್ಟೋಬರ್ ತಿಂಗಳಿನಲ್ಲಿ ಈ ಸಂಖ್ಯೆ 2,84,223ಕ್ಕೆ ಕುಸಿದಿದೆ.

ಸಿಯಾಮ್ ವರದಿಯ ಪ್ರಮುಖ ಅಂಶಗಳು:
– ಪ್ರಯಾಣಿಕರ ವಾಹನಗಳ ವಿಭಾಗಲದಲ್ಲಿ ಒಟ್ಟಾರೆ ಉತ್ಪಾದನೆ ಶೇ.21.14 ರಷ್ಟಕ್ಕೆ ಕುಸಿಯುವ ಮೂಲಕ 2,69,186 ವಾಹನಗಳು ಮಾರಾಟವಾಗಿದ್ದು, ರಫ್ತುವಿನಲ್ಲಿ ಶೇ.2.18ರಷ್ಟು ಕುಸಿತವಾಗಿದೆ.
– ಕಳೆದ ತಿಂಗಳು ಒಟ್ಟು 2,85,027 ಯುನಿಟ್ಗಳಷ್ಟು ಪ್ರಯಾಣಿಕ ವಾಹನಗಳು ಮಾರಾಟವಾಗಿದ್ದರೆ ಇದರಲ್ಲಿ 1,73,549ನಷ್ಟು ಕಾರುಗಳು ಮಾರಾಟಗೊಂಡಿದ್ದು, ಒಟ್ಟಾರೆ ಉತ್ಪಾದನೆಯಲ್ಲಿ ಶೇ.6.34 ರಷ್ಟು ಕುಸಿತ ಕಂಡಿದೆ.
– ಒಟ್ಟು 1,62,343 ಪ್ರಯಾಣಿಕ ಕಾರುಗಳು ಮಾರಾಟವಾಗಿದ್ದು, ಕಳೆದ ವರ್ಷದ ಉತ್ಪಾದನಾ ಮಟ್ಟಕ್ಕೆ ಹೋಲಿಸಿದ್ದರೆ ಶೇ.30.22 ರಷ್ಟು ಕುಸಿದಿದೆ.
– ಪ್ರಯಾಣಿಕ ವಾಹನಗಳು, ವಾಣಿಜ್ಯ ವಾಹನಗಳು, ದ್ವಿಚಕ್ರ ವಾಹನಗಳು ಮತ್ತು ತ್ರಿಚಕ್ರ ವಾಹನಗಳು ಸೇರಿದಂತೆ ಒಟ್ಟು ದೇಶೀಯ ಮಾರಾಟದಲ್ಲಿ ವರ್ಷದಿಂದ ವರ್ಷಕ್ಕೆ ಶೇ.12.76ರಷ್ಟು ಕುಸಿತ ಕಾಣುತ್ತಿದೆ.
– ಒಟ್ಟು ಉತ್ಪಾದನೆಯಲ್ಲಿ ಶೇ.26.22 ರಷ್ಟು ಕುಸಿತ ಕಂಡು ಬಂದಿದ್ದರೆ, ರಫ್ತಿನಲ್ಲಿ ಶೇ.2.72 ರಷ್ಟು ಏರಿಕೆಯಾಗಿದೆ ಎಂದು ವರದಿಯಲ್ಲಿನ ಅಂಕಿ ಅಂಶಗಳು ಹೇಳುತ್ತಿವೆ.
– ಕಮರ್ಷಿಯಲ್ ವಾಹನಗಳ ವಿಭಾಗದಲ್ಲಿ ಪ್ರಯಾಣಿಕ, ಸರಕು, ಮಧ್ಯಮ ಮತ್ತು ದೊಡ್ಡ ವಾಹನಗಳು ಸೇರಿದಂತೆ ವಾಣಿಜ್ಯ ಉಪಯೋಗಿ ವಾಹನಗಳ ಮಾರಾಟದಲ್ಲಿ ಶೇ.23.31 ರಷ್ಟು ಇಳಿಕೆಯಾಗಿದೆ.
– ಈ ತಿಂಗಳಲ್ಲಿ ಒಟ್ಟು 66,773 ವಾಣಿಜ್ಯ ವಾಹನಗಳು ಮಾರಾಟವಾಗಿದ್ದು, ಇದರಲ್ಲಿ 51,439 ಲಘು ವಾಣಿಜ್ಯ ವಾಹನಗಳು ಸೇರಿವೆ.
– ಅಕ್ಟೋಬರ್ ನಲ್ಲಿ ಒಟ್ಟು 17,57,264 ದ್ವಿಚಕ್ರ ವಾಹನಗಳು ಮಾರಾಟವಾಗಿದ್ದು, ಹಿಂದಿನ ವರ್ಷಕ್ಕಿಂತ ಶೇ.14.43 ರಷ್ಟು ಕಡಿಮೆ ಇದೆ.
– ದ್ವಿಚಕ್ರ ವಾಹನಗಳ ರಫ್ತುವಿನಲ್ಲಿ ಶೇ.8.03 ರಷ್ಟು ಏರಿಕೆಯಾದರೂ, ಉತ್ಪಾದನಾ ಮಟ್ಟದಲ್ಲಿ ಮಾತ್ರ ಶೇ.26.57 ರಷ್ಟು ಕುಸಿತವಾಗಿದೆ.