ಖಾಸಗಿ ರೈಲು ಓಡಿಸಲಿವೆ 2 ಸರಕಾರಿ ಕಂಪೆನಿಗಳು

Team Udayavani, Aug 4, 2021, 10:25 AM IST

ಹೊಸದಿಲ್ಲಿ: 2023-24ನೇ ಸಾಲಿನ ಒಳಗಾಗಿ ದೇಶದಲ್ಲಿ ಖಾಸಗಿ ರೈಲುಗಳನ್ನು ಓಡಿಸಲು ಕೇಂದ್ರ ಸರಕಾರ ಸಿದ್ಧತೆ ನಡೆಸಿದೆ. ಅದಕ್ಕೆ ಪೂರಕವಾಗಿ ಕೇಂದ್ರದ ಎರಡು ಕಂಪೆನಿಗಳಾ ಗಿರುವ ಇಂಡಿಯನ್‌ ರೈಲ್ವೆ ಕ್ಯಾಟರಿಂಗ್‌ ಆ್ಯಂಡ್‌ ಟೂರಿಸಂ ಕಾರ್ಪೊರೇಶನ್‌ (ಐಆರ್‌ಸಿಟಿಸಿ) ಮತ್ತು ಬೆಂಗಳೂರಿನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ಭಾರತ್‌ ಹೆವಿ ಎಲೆಕ್ಟ್ರಿಕಲ್ಸ್‌ ಲಿ. (ಬಿಎಚ್‌ಇಎಲ್‌) ಖಾಸಗಿ ರೈಲುಗಳನ್ನು ಓಡಿಸುವ ಬಗ್ಗೆ ಮಾತುಕತೆ ನಡೆಸಿವೆ. ಈ ಯೋಜನೆಗೆಂದೇ ವಿಶೇಷ ಉದ್ದೇಶಿತ ವಾಹಕ (ಎಸ್‌ಪಿವಿ) ಸ್ಥಾಪಿಸಲು ಯೋಚಿಸಿವೆ.

ಖಾಸಗಿ ರೈಲು ಓಡಿಸುವ ಕೇಂದ್ರ ಸರಕಾರದ ಯೋಚನೆಗೆ ಅನುಗುಣವಾಗಿ ಐಆರ್‌ಸಿಟಿಸಿ ಈಗಾಗಲೇ ಕೆಲವೊಂದು ಮಾರ್ಗಗಳ ಮೇಲೆ ಬಿಡ್‌ ಸಲ್ಲಿಕೆ ಮಾಡಿದೆ. ಎರಡೂ ಸಂಸ್ಥೆಗಳ ನಡುವಿನ ಮಾತುಕತೆ ಪ್ರಕಾರ, ಬಿಎಚ್‌ಇಎಲ್‌ ಖಾಸಗಿ ರೈಲು ಸೇವೆ ಶುರು ಮಾಡಲು ಬೇಕಾದ ಬಂಡವಾಳ ಪೂರೈಸಲಿದೆ. ಐಆರ್‌ಸಿಟಿಸಿ ರೈಲುಗಳ ನಿರ್ವಹಣೆಯ ಜವಾಬ್ದಾರಿ ವಹಿಸಿಕೊಳ್ಳಲಿದೆ ಎಂದು ಹಿರಿಯ ಅಧಿಕಾರಿ “ಬ್ಯುಸಿನೆಸ್‌ ಸ್ಟಾಂಡರ್ಡ್‌’ ಪತ್ರಿಕೆಗೆ ತಿಳಿಸಿದ್ದಾರೆ.

ಖಾಸಗಿ-ಸರಕಾರಿ ಸಹಭಾಗಿತ್ವದಲ್ಲಿ ಖಾಸಗಿ ರೈಲು ಓಡಿಸಲು ಕರೆಯಲಾಗಿದ್ದ ಬಿಡ್‌ಗಳನ್ನು ಕಳೆದ ತಿಂಗಳು ತೆರೆಯಲಾಗಿದೆ. ಬೆಂಗಳೂರು ಸೇರಿದಂತೆ 12 ಕೇಂದ್ರಗಳನ್ನು ರೈಲ್ವೇ ಇಲಾಖೆ ಗುರುತಿಸಿದೆ. 40 ಅತ್ಯಾಧುನಿಕ ರೇಕ್‌ಗಳ ಜತೆಗೆ 29 ಜೋಡಿ ರೈಲುಗಳನ್ನು ಓಡಿಸಲು ಯೋಜನೆ ಸಿದ್ಧಗೊಂಡಿದೆ. ಆರಂಭದಲ್ಲಿಯೇ ಒಟ್ಟು 30 ಸಾವಿರ ಕೋಟಿ ರೂ. ಬಂಡವಾಳ ಹೂಡಿಕೆ ಯಾಗುವ ನಿರೀಕ್ಷೆಯಲ್ಲಿದೆ ಕೇಂದ್ರ. ಶೀಘ್ರವೇ ಬಿಡ್‌ಗಳನ್ನು ಪ್ರಕಟಿಸುವ ಸಾಧ್ಯತೆ ಇದೆ.