ಲಾಭನಗದೀಕರಣ: ಮುಂಬಯಿ ಶೇರು 63 ಅಂಕಗಳ ಅಲ್ಪ ಏರಿಕೆಗೆ ತೃಪ್ತ

Team Udayavani, Mar 17, 2017, 4:45 PM IST

ಮುಂಬಯಿ : ಲಾಭ ನಗದೀಕರಣದ ಪರಿಣಾಮವಾಗಿ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಸೂಚ್ಯಂಕ ಇಂದು ಶುಕ್ರವಾರದ, ವಾರಾಂತ್ಯ ದಿನದ, ವಹಿವಾಟನ್ನು ಮಟ್ಟಸವಾಗಿ ಕೊನೆಗೊಳಿಸಿತು. 

ದಿನಾಂತ್ಯದಲ್ಲಿ ಸೆನ್ಸೆಕ್ಸ್‌ 63.14 ಅಂಕಗಳ ಏರಿಕೆಯನ್ನು ಕಾಯ್ದುಕೊಂಡು 29,648.99 ಅಂಕಗಳ ಮಟ್ಟಕ್ಕೆ ತಲುಪಿತಾದರೆ, ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ ದಾಖಲೆಯ ಎತ್ತರವಾಗಿ 9,160.05 ಅಂಕಗಳ ಮಟ್ಟದಲ್ಲಿ ದಿನದ ವಹಿವಾಟನ್ನುಕೇವಲ 6.35 ಅಂಕಗಳ ಏರಿಕೆಗೆ ತೃಪ್ತಿಪಟ್ಟು ಕೊನೆಗೊಳಿಸಿತು.

ಇಂದಿನ ವಹಿವಾಟಿನಲ್ಲಿ ಟಾಪ್‌ ಗೇನರ್‌ ಎನಿಸಿಕೊಂಡ ಶೇರುಗಳೆಂದರೆ : ಐಟಿಸಿ, ಎಚ್‌ಸಿಎಲ್‌ ಟೆಕ್‌, ಇನ್‌ಫೋಸಿಸ್‌, ವಿಪ್ರೋ, ಈಶರ್‌ ಮೋಟರ್‌.

ಟಾಪ್‌ ಲೂಸರ್‌ಗಳು : ಐಡಿಯಾ ಸೆಲ್ಯುಲರ್‌, ಭಾರ್ತಿ ಏರ್‌ಟೆಲ್‌, ಬ್ಯಾಂಕ್‌ ಆಫ್ ಬರೋಡ, ಟಾಟಾ ಮೋಟರ್‌, ಎಸ್‌ಬಿಐ.

ಇಂದಿನ ವಹಿವಾಟಿನ ಹರಹು ಋಣಾತ್ಮಕವಾಗಿತ್ತು. 1,225 ಶೇರುಗಳು ಮುನ್ನಡೆ ಕಂಡರೆ 1,593 ಶೇರುಗಳು ಹಿನ್ನಡೆಗೆ ಗುರಿಯಾದವು; 204 ಶೇರುಗಳು ಯಾವುದೇ ಬದಲಾವಣೆ ಕಾಣಲಿಲ್ಲ.

ಶೇರು ತಜ್ಞರ ಪ್ರಕಾರ ಪ್ರಕೃತ ಮುಂಬಯಿ ಶೇರು ಪೇಟೆಯಲ್ಲಿ ಸಾಗುತ್ತಿರುವ ಅದ್ಭುತವಾದ ಗೂಳಿ ಸವಾರಿಯು ಈ ವರ್ಷಾಂತ್ಯದ ವರೆಗೆ ಹೀಗೆಯೇ ಮುಂದುವರಿಯಲಿದೆ; ವರ್ಷಾಂತ್ಯಕ್ಕೆ ಮುಂಬಯಿ ಶೇರು ಸೂಚ್ಯಂಕ ಸೆನ್ಸೆಕ್ಸ್‌ 35,000 ಅಂಕಗಳ ಅಮೋಘ ಮತ್ತು ಅಭೂತಪೂರ್ವ ಎತ್ತರವನ್ನು ತಲುಪಲಿದೆ.