ಲಾಭ ನಗದೀಕರಣ : ಮುಂಬಯಿ ಶೇರು ಪೇಟೆಗೆ 35 ಅಂಕ ನಷ್ಟ

Team Udayavani, Jan 30, 2017, 11:51 AM IST

ಮುಂಬಯಿ : ಹೂಡಿಕೆದಾರರು ಹಾಗೂ ವಹಿವಾಟುದಾರರು ಲಾಭ ನಗದೀಕರಣಕ್ಕೆ ಮುಂದಾದ ಪ್ರಯುಕ್ತ ಇಂದು ಸೋಮವಾರದ ವಹಿವಾಟನ್ನು 35 ಅಂಕಗಳ ಕುಸಿತದೊಂದಿಗೆ ಆರಂಭಿಸಿದ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌, ಮಧ್ಯಾಹ್ನ 12 ಗಂಟೆಯ ಸುಮಾರಿಗೆ ತನ್ನ ನಷ್ಟವನ್ನು 10 ಅಂಕಗಳಿಗೆ ಇಳಿಸಿಕೊಂಡು 27,872.21 ಅಂಕಗಳ ಮಟ್ಟದಲ್ಲಿ  ವ್ಯವಹಾರ ನಿರತವಾಗಿತ್ತು.

ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 5.95 ಅಂಕಗಳ ನಷ್ಟಕ್ಕೆ ಗುರಿಯಾಗಿ ಮಧ್ಯಾಹ್ನದ ವೇಳೆಗೆ 8,635.30 ಅಂಕಗಳ ಮಟ್ಟದಲ್ಲಿ ವ್ಯವಹಾರ ನಿರತವಾಗಿತ್ತು. 

ಕೇಂದ್ರ ಬಜೆಟ್‌ ಮಂಡನೆಯ ದಿನ ಸಮೀಪಿಸುತ್ತಿರುವಂತೆಯೆ ಎಚ್ಚರಿಕೆಯ ನಡೆ ತೋರುತ್ತಿರುವ ಮುಂಬಯಿ ಶೇರು ಪೇಟೆಯನ್ನು ಇಂದು ಐಟಿ ಶೇರುಗಳು ಕೆಳಕ್ಕೆ ಎಳೆದವು.  ಮೇಲಾಗಿ ಏಶ್ಯನ್‌ ಶೇರು ಪೇಟೆಗಳಲ್ಲಿ ತೋರಿ ಬಂದ ದೌರ್ಬಲ್ಯ ಕೂಡ ಸೆನ್ಸೆಕ್ಸ್‌, ನಿಫ್ಟಿ ಕುಸಿತಕ್ಕೆ ಕಾರಣವಾದವು. 

ಇಂದಿನ ಆರಂಭಿಕ ವಹಿವಾಟಿನಲ್ಲಿ ಜಪಾನಿನ ನಿಕ್ಕಿ ಶೇ.0.74ರ ನಷ್ಟಕ್ಕೆ ಗುರಿಯಾಯಿತು. ಆದರೆ ಶಾಂಘೈ ಸೂಚ್ಯಂಕ ಶೇ.0.31ರ ಏರಿಕೆಯನ್ನು ಕಂಡಿತು. ಹಾಂಕಾಂಗ್‌ ಶೇರು ಮಾರುಕಟ್ಟೆ ಇಂದು ಸಾರ್ವಜನಿಕ ರಜೆಯ ಪ್ರಯುಕ್ತ ಮುಚ್ಚಿತ್ತು.