200ರೂ. ನೋಟು ಮುದ್ರಣ ಶುರು

Team Udayavani, Jun 29, 2017, 4:30 PM IST

ಮುಂಬೈ/ಕೋಲ್ಕತಾ: 200 ರೂ. ನೋಟು ಬಿಡುಗಡೆಗೆ ರಿಸರ್ವ್‌ ಬ್ಯಾಂಕ್‌ ತೀರ್ಮಾನಿಸಿರುವಂತೆಯೇ, ನೋಟು
ಮುದ್ರಣ ಆರಂಭಗೊಂಡಿದೆ. ರಿಸರ್ವ್‌ ಬ್ಯಾಂಕ್‌ನಿಂದ ಬೇಡಿಕೆ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರದ ನೋಟು ಮುದ್ರಣ ಘಟಕದಲ್ಲಿ 200 ರೂ. ನೋಟು ಮುದ್ರಣ ಆರಂಭಗೊಂಡಿದೆ.

ಈ ನೋಟು ಅತ್ಯಾಧುನಿಕ ಸುರಕ್ಷತಾ ಮಾನದಂಡಗಳನ್ನು ಹೊಂದಿರಲಿದೆ. ಸದ್ಯ ಇದರ ಗುಣಮಟ್ಟ ಮತ್ತು ಭದ್ರತೆಗಳ ಕುರಿತ ಪರೀಕ್ಷೆ  ಮಧ್ಯಪ್ರದೇಶದ ಹೊಸಂಗಾಬಾದ್‌ನ ಸರ್ಕಾರಿ ಮುದ್ರಣಾಲಯದಲ್ಲಿ ನಡೆಸಲಾಗುತ್ತಿದೆ ಎಂದು
ಮೂಲಗಳು ಹೇಳಿವೆ. 

“200 ರೂ. ನೋಟು ಬಿಡುಗಡೆಯಿಂದ ದಿನನಿತ್ಯದ ವ್ಯವಹಾರಗಳು ಇನ್ನೂ ಸುಗಮವಾಗಲಿದೆ’ ಎಂದು ಎಸ್‌ಬಿಐ ಗ್ರೂಪ್‌ನ ಮುಖ್ಯ ಆರ್ಥಿಕ ತಜ್ಞ ಕಾಂತಿ ಘೋಷ್‌ ಹೇಳಿದ್ದಾರೆ. ಅಪನಗದೀಕರಣ ಬಳಿಕ ಕೇಂದ್ರ ಸರ್ಕಾರ 200 ರೂ. ನೋಟು ಹೊರತರುವ ತೀರ್ಮಾನ ಮಾಡಿತ್ತು. ಈ ಪ್ರಸ್ತಾವನೆಯನ್ನು ರಿಸರ್ವ್‌ ಬ್ಯಾಂಕ್‌ ಅನುಮೋದಿಸಿತ್ತು. 2000
ರೂ. ಮತ್ತು 500 ರೂ. ಹೊಸ ನೋಟುಗಳ ನಡುವಿನ ಅಂತರವನ್ನು 200ರ ನೋಟು ತುಂಬಲಿದೆ ಎಂದು ಘೋಷ್‌ ಹೇಳಿದ್ದಾರೆ.

ಜೂ.9ಕ್ಕೆ ಕೊನೆಗೊಂಡಂತೆ ಸಾರ್ವಜನಿಕವಾಗಿ 14.6 ಲಕ್ಷ ಕೋಟಿ ರೂ.ಚಲಾವಣೆಯಲ್ಲಿದೆ. ನೋಟು ಅಮಾನ್ಯಕ್ಕೆ ಹೋಲಿಕೆ ಮಾಡಿದರೆ ಅದು ಶೇ.18.4ಕ್ಕಿಂತ ಕಡಿಮೆಯಾಗಿದೆ.