ಪುನರ್‌ ಸಾಲ, ಮನೆ ಖರೀದಿಗೆ ಬ್ಯಾಂಕ್‌ಗಳ ಸಂಪರ್ಕಿಸಿ: ಸರಕಾರ

Team Udayavani, Nov 8, 2019, 4:58 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಹೊಸದಿಲ್ಲಿ: ರಿಯಲ್‌ ಎಸ್ಟೇಟ್‌ ಪುನಶ್ಚೇತನಕ್ಕೆ 25 ಸಾವಿರ ಕೋಟಿ ರೂ. ವಿತ್ತೀಯ ನೆರವು ನೀಡಿದ ಹಿನ್ನೆಲೆಯಲ್ಲಿ ಮನೆ ಖರೀದಿಸುವವರು ಬ್ಯಾಂಕ್‌ಗಳನ್ನು ಸಂಪರ್ಕಿಸಬಹುದು. ಈ ಮೂಲಕ ಹೆಚ್ಚುವರಿ ಸಾಲಕ್ಕೆ ಮತ್ತು ಸಾಲ ಪುನಃಶ್ಚೇತನಕ್ಕೆ ಮುಂದಾಗಲು ಅವಕಾಶ ಕಲ್ಪಿಸಲಾಗಿದೆ ಎಂದು ಕೇಂದ್ರ ಸರಕಾರ ಗುರುವಾರ ಹೇಳಿದೆ. ಕೋರ್ಟ್‌ಗಳಲ್ಲಿ ಮೊಕದ್ದಮೆ ಎದುರಿಸುತ್ತಿರುವ ಗೃಹ ನಿರ್ಮಾಣ ಯೋಜನೆಗಳಿಗೆ ಈ ವ್ಯವಸ್ಥೆ ಅನ್ವಯವಾಗುವುದಿಲ್ಲ ಎಂಬ ಸೂಚನೆಯನ್ನೂ ಸರಕಾರ ನೀಡಿದೆ.

ಬದಲಿ ವಿತ್ತೀಯ ಯೋಜನೆ (ಎಐಎಫ್)ಅಥವಾ ಸ್ಪೆಷಲ್‌ ವಿಂಡೋ ಮೂಲಕ ನಿಗದಿತ ಗೃಹ ಯೋಜನೆಗೆ ಗರಿಷ್ಠವೆಂದರೆ 400 ಕೋಟಿ ರೂ. ಆರ್ಥಿಕ ನೆರವು ಸಿಗಲಿದೆ ಎಂದು ಕೇಂದ್ರ ವಿತ್ತ ಸಚಿವಾಲಯ ಹೇಳಿದೆ. ಈ ಬಗ್ಗೆ ಅದು ಪದೇ ಪದೆ ಕೇಳಲಾಗುವ ಪ್ರಶ್ನೆಗಳು (ಎಫ್ಎಕ್ಯೂ) ಎಂಬ ಶೀರ್ಷಿಕೆ ಯಲ್ಲಿ ಮಾಹಿತಿ ಬಿಡುಗಡೆ ಮಾಡಿದೆ.

ಕೈಗೆಟಕುವ, ಮಧ್ಯಮ ವರ್ಗದ ಆದಾಯ ಹೊಂದಿರುವವರಿಗಾಗಿ ಇರುವ 2,152 ಚದರ ಅಡಿ (ವ್ಯಾಸ್ತವ್ಯಕ್ಕೆ ಸಿಗುವ ಸ್ಥಳ) ಮನೆ ನಿರ್ಮಾಣ ಯೋಜನೆಗಳಿಗೆ ಮುಂಬಯಿ ಮೆಟ್ರೋ ಪಾಲಿಟನ್‌ ಪ್ರದೇಶದಲ್ಲಿ 2 ಕೋಟಿ ರೂ., ವರೆಗೆ, ಬೆಂಗಳೂರು, ಅಹಮದಾಬಾದ್‌, ಚೆನ್ನೈ, ಕೋಲ್ಕತಾ, ಪುಣೆ, ರಾಷ್ಟ್ರೀಯ ರಾಜಧಾನಿ ಪ್ರದೇಶ (ಎನ್‌ಸಿಆರ್‌), ಹೈದರಾಬಾದ್‌ಗಳಲ್ಲಿ 1.5 ಕೋಟಿ ರೂ. ವರೆಗೆ, ದೇಶದ ಇತರ ಭಾಗಗಳಲ್ಲಿ 1 ಕೋಟಿ ರೂ. ವರೆಗೆ ಮಿತಿ ನಿಗದಿ ಮಾಡಲಾಗಿದೆ.