IMFನಿಂದ ಜಾಗತಿಕ ಆರ್ಥಿಕ ಪ್ರಗತಿ ಅಂದಾಜು ಕಡಿತ : ಸೆನ್ಸೆಕ್ಸ್‌ 28 ಅಂಕ ನಷ್ಟ

Team Udayavani, Apr 10, 2019, 10:38 AM IST

ಮುಂಬಯಿ : IMF ಜಾಗತಿಕ ಆರ್ಥಿಕ ಪ್ರಗತಿಯ ಅಂದಾಜನ್ನು ಕಡಿತಗೊಳಿಸಿ ಶೇ.3.3ಕ್ಕೆ ನಿಗದಿಸಿರುವ ಹಿನ್ನೆಲೆಯಲ್ಲಿ ಏಶ್ಯನ್‌ ಶೇರು ಪೇಟೆಗಳಲ್ಲಿ ಹಿನ್ನಡೆ ತೋರಿಬಂದಿರುವುದನ್ನು ಅನುಸರಿಸಿರುವ ಮುಂಬಯಿ ಶೇರು ಪೇಟೆ ಇಂದು ಬುಧವಾರದ ಆರಂಭಿಕ ವಹಿವಾಟಿನಲ್ಲಿ ಅಲ್ಪ ಕುಸಿತಕ್ಕೆ ಗುರಿಯಾಯಿತು.

ಬೆಳಗ್ಗೆ 10.30ರ ಸುಮಾರಿಗೆ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಸೂಚ್ಯಂಕ 27.58 ಅಂಕಗಳ ನಷ್ಟದೊಂದಿಗೆ 38,911.64 ಅಂಕಗಳ ಮಟ್ಟದಲ್ಲೂ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 4.60 ಅಂಕಗಳ ನಷ್ಟದೊಂದಿಗೆ 11,667.40 ಅಂಕಗಳ ಮಟ್ಟದಲ್ಲೂ ವ್ಯವಹಾರ ನಿರತವಾಗಿದ್ದವು.

ಹಾಗಿದ್ದರೂ ಡಾಲರ್‌ ಎದುರು ರೂಪಾಯಿ ಇಂದಿನ ಆರಂಭಿಕ ವಹಿವಾಟಿನಲ್ಲಿ 21 ಪೈಸೆಗಳ ಚೇತರಿಕೆಯನ್ನು ಕಂಡ 69.09 ರೂ. ಮಟ್ಟದಲ್ಲಿ ವ್ಯವಹಾರ ನಿರತವಾಗಿತ್ತು.

ಮುಂಬಯಿ ಶೇರು ಪೇಟೆಯ ಇಂದಿನ ಆರಂಭಿಕ ವಹಿವಾಟಿನಲ್ಲಿ ಟಾಪ್‌ ಗೇನರ್‌ಗಳಾಗಿ ಸಿಪ್ಲಾ, ಟಾಟಾ ಮೋಟರ್‌, ವಿಪ್ರೋ,ಕೋಲ್‌ ಇಂಡಿಯಾ, ಡಾ.ರೆಡ್ಡಿ ಮೂಡಿ ಬಂದವು; ಟಾಪ್‌ ಲೂಸರ್‌ : ಟಿಸಿಎಸ್‌, ಗೇಲ್‌, ಹೀರೋ ಮೋಟೋ ಕಾರ್ಪ್‌, ಟೈಟಾನ್‌ ಕಂಪೆನಿ, ಎಚ್‌ ಡಿ ಎಫ್ ಸಿ.