ಕಚ್ಚಾ ತೈಲ ಬೆಲೆ ಏರಿಕೆ ಆತಂಕ; ಮುಂಬೈ ಶೇರುಪೇಟೆ ಸೆನ್ಸೆಕ್ಸ್ 642 ಅಂಕ ಕುಸಿತ

Team Udayavani, Sep 17, 2019, 1:55 PM IST

ಮುಂಬೈ:ಸೌದಿ ಅರೇಬಿಯಾದ ಅರಾಮ್ಕೋ ತೈಲ ಘಟಕಗಳ ಮೇಲೆ ದಾಳಿ ನಡೆದ ಹಿನ್ನೆಲೆಯಲ್ಲಿ ಕಚ್ಛಾ ತೈಲ ಬೆಲೆ ಏರಿಕೆಯಾಗಲಿದೆ ಎಂಬ ಆತಂಕ ಹಾಗೂ ಡಾಲರ್ ಎದುರು ರೂಪಾಯಿ ಮೌಲ್ಯ ಕುಸಿತ ಕಂಡ ಹಿನ್ನೆಲೆಯಲ್ಲಿ ಮಂಗಳವಾರ ಮುಂಬೈ ಶೇರುಪೇಟೆಯ ಸೆನ್ಸೆಕ್ಸ್ ಸೂಚ್ಯಂಕ 642 ಅಂಕಗಳ ಭಾರೀ ಕುಸಿತದೊಂದಿಗೆ 36,481 ಅಂಕಗಳೊಂದಿಗೆ ವಹಿವಾಟು ಅಂತ್ಯಕಂಡಿದೆ.

ಅಲ್ಲದೇ ರಾಷ್ಟ್ರೀಯ ಶೇರು ಮಾರುಕಟ್ಟೆ ನಿಫ್ಟಿ ಸೂಚ್ಯಂಕ ಕೂಡಾ 186 ಅಂಕಗಳ ಕುಸಿತದೊಂದಿಗೆ 10, 818 ಅಂಕಕ್ಕಿಂತ ಕೆಳಕ್ಕೆ ಕುಸಿದಿದೆ. ನಿಫ್ಟಿ ಆಟೋ ಸೂಚ್ಯಂಕ ಶೇ.1.7ರಷ್ಟು ಕುಸಿತ ಕಂಡಿದೆ. ಅಲ್ಲದೇ ಬ್ಯಾಂಕಿಂಗ್, ಐಟಿ, ಮಾಧ್ಯಮ, ಪಿಎಸ್ ಯು ಬ್ಯಾಂಕ್ ಹಾಗೂ ಖಾಸಗಿ ಬ್ಯಾಂಕ್ ಗಳ ಸೂಚ್ಯಂಕ ಸಹ ತಲಾ ಶೇ.1ರಷ್ಟು ಕುಸಿತವಾಗಿರುವುದಾಗಿ ವರದಿ ತಿಳಿಸಿದೆ.

ಶೇರುಪೇಟೆಯ ಸೆನ್ಸೆಕ್ಸ್ ಸೂಚ್ಯಂಕ ಕುಸಿತದಿಂದ ಎಚ್ ಡಿಎಫ್ ಸಿ, ಆ್ಯಕ್ಸಿಸ್ ಬ್ಯಾಂಕ್, ರಿಲಯನ್ಸ್ ಇಂಡಸ್ಟ್ರೀಸ್, ಎಲ್ ಅಂಡ್ ಟಿ, ಐಸಿಐಸಿಐ ಬ್ಯಾಂಕ್ ನ ಸೆನ್ಸೆಕ್ಸ್ ಭಾರೀ ಪ್ರಮಾಣದಲ್ಲಿ ಕುಸಿತ ಕಂಡಿದೆ.

ನಿಫ್ಟಿ ಲೂಸರ್ಸ್: ಟೆಕ್ ಮಹೀಂದ್ರ 2.70ರಷ್ಟು ಕುಸಿತ, ಆ್ಯಕ್ಸಿಸ್ ಬ್ಯಾಂಕ್-2.68ರಷ್ಟು ಕುಸಿತ, ಭಾರ್ತಿ ಏರ್ ಟೆಲ್-2.46ರಷ್ಟು ಕುಸಿತ, ಹೀರೋ ಮೋಟೋ ಕಾರ್ಪೋರೇಶನ್ 2.25ರಷ್ಟು ಕುಸಿತ, ಸಿಪ್ಲಾ 2.02ರಷ್ಟು ಕುಸಿತವಾಗಿದೆ.