ನಿರಂತರ 3ನೇ ದಿನವೂ ಕುಸಿತ: ಮುಂಬಯಿ ಶೇರು 150 ಅಂಕ ನಷ್ಟ

Team Udayavani, Mar 15, 2018, 4:27 PM IST

ಮುಂಬಯಿ : ನಿರಂತರ ಮೂರನೇ ದಿನ ಕುಸಿತದ ಹಾದಿಯಲ್ಲಿ ಸಾಗಿ ಬಂದಿರುವ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಸೂಚ್ಯಂಕ ಇಂದು ಗುರುವಾರದ ವಹಿವಾಟನ್ನು 150 ಅಂಕಗಳ ನಷ್ಟದೊಂದಿಗೆ 33,685.54 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು.

ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 50.75 ಅಂಕಗಳ ನಷ್ಟದೊಂದಿಗೆ ದಿನದ ವಹಿವಾಟನ್ನು 10,360.15 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು. ಕಳೆದೆರಡು ದಿನಗಳ ವಹಿವಾಟಿನಲ್ಲಿ ಸೆನ್ಸೆಕ್ಸ್‌ ಒಟ್ಟು 82.20 ಅಂಕಗಳ ನಷ್ಟವನ್ನು ಅನುಭವಿಸಿತ್ತು. 

ಎಸ್‌ ಬ್ಯಾಂಕ್‌, ಐಸಿಐಸಿಐ ಬ್ಯಾಂಕ್‌ ಮತ್ತು ಎಸ್‌ಬಿಐ ನೇತೃತ್ವದಲ್ಲಿ ಬ್ಯಾಂಕ್‌ ಶೇರುಗಳೆಲ್ಲ ಇಂದು ತೀವ್ರ ಹಿನ್ನಡೆಗೆ ಗುರಿಯಾದವು. ಪಂಜಾಬ್‌ ನ್ಯಾಶನಲ್‌ ಬ್ಯಾಂಕಿನ ಬ್ರಾಡಿ ಹೌಸ್‌ ಶಾಖೆಯಲ್ಲಿ ಚಂದ್ರಿ ಪೇಪರ್‌ ಆ್ಯಂಡ್‌ ಅಲೈಡ್‌ ಪ್ರಾಡಕ್ಟ್  ಸಂಸ್ಥೆಗೆ ಅಕ್ರಮವಾಗಿ 9 ಕೋಟಿ ರೂ.ಗಳ ಎಲ್‌ಓಯು ನೀಡಲಾಗಿರುವುದರ ವಿರುದ್ಧ ಸಿಬಿಐ ಇಂದು ಕೇಸು ದಾಖಲಿಸಿಕೊಂಡಿತು. ಬ್ಯಾಂಕ್‌ ಶೇರುಗಳ ಕುಸಿತಕ್ಕೆ ಈ ವಿದ್ಯಮಾನವೇ ಕಾರಣವಾಯಿತು. 

ಮುಂಬಯಿ ಶೇರು ಪೇಟೆಯಲ್ಲಿ ಇಂದು 2,847 ಕಂಪೆನಿಗಳ ಶೇರುಗಳು ವಹಿವಾಟಿಗೆ ಒಳಪಟ್ಟವು. ಈ ಪೈಕಿ 1,640 ಶೇರುಗಳು ಮುನ್ನಡೆ ಸಾಧಿಸಿದವು; 1,04 ಶೇರುಗಳು ಹಿನ್ನಡೆಗೆ ಗುರಿಯಾದವು; 162 ಶೇರುಗಳು ಯಾವುದೇ ಬದಲಾವಣೆ ಕಾಣಲಿಲ್ಲ.