ದುಸ್ಥಿತಿಗೆ ಬಂದು ತಲುಪಿದ ಆಟೊಮೊಬೈಲ್ ಕ್ಷೇತ್ರ

Team Udayavani, Aug 14, 2019, 5:13 AM IST

ನವದೆಹಲಿ: ಕಳೆದ 19 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ದೇಶದ ಆಟೋಮೊಬೈಲ್ ಕ್ಷೇತ್ರವು ದುಸ್ಥಿತಿಗೆ ತಲುಪಿದ್ದು, ಕಳೆದ ಮೂರು ತಿಂಗಳಲ್ಲಿ ಈ ಕ್ಷೇತ್ರದ ಸುಮಾರು 15,000 ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದಾರೆ ಎಂದು ಭಾರ ತೀಯ ಆಟೊಮೊಬೈಲ್ ಕಂಪನಿಗಳ ಸೊಸೈಟಿ (ಎಸ್‌ಐಎಎಂ) ತಿಳಿಸಿದೆ.

ಕಳೆದ ತಿಂಗಳು ಪ್ರಯಾಣಿಕರ ವಾಹನ (ಪಿ.ವಿ.) ಹಾಗೂ ದ್ವಿಚಕ್ರ ವಾಹನಗಳು ದೇಶಾದ್ಯಂತ 18,25,148 ಮಾತ್ರ ಮಾರಾಟವಾಗಿವೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 22,45,223 ವಾಹನಗಳು ಮಾರಾಟವಾಗಿದ್ದವು. ಈ ಹಿಂದೆ, 2000ರ ಡಿಸೆಂಬರ್‌ನಲ್ಲಿ ವಾಹನಗಳ ಮಾರಾಟ ಶೇ. 21.81ರಷ್ಟು ಇಳಿಮುಖವಾಗಿ ಆಟೊಮೊಬೈಲ್ ರಂಗ ಶೋಚನೀಯ ಸ್ಥಿತಿಗೆ ತಲುಪಿತ್ತು. ಇನ್ನು, ಕಾರು ಇನ್ನಿತರ ಪ್ರಯಾಣಿಕರ ಸಾಗಾಣಿಕೆ ವಾಹನಗಳ ಮಾರಾಟ ಶೇ. 30ರಷ್ಟು ಇಳಿಮುಖವಾಗಿದೆ. ಕಳೆದ ಜುಲೈನಲ್ಲಿ 2.90 ಲಕ್ಷ ವಾಹನಗಳು ಮಾರಾಟವಾಗಿದ್ದರೆ, ಈ ವರ್ಷ ಜುಲೈನಲ್ಲಿ 2 ಲಕ್ಷ ವಾಹನ ಮಾತ್ರ ಮಾರಾಟವಾಗಿವೆ. 2000ನೇ ಡಿಸೆಂಬರ್‌ನಲ್ಲಿ ಶೇ. 35ರಷ್ಟು ಮಾರಾಟ ಇಳಿಮುಖ ವಾಗಿತ್ತು ಎಂದು ಎಸ್‌ಐಎಎಂ ವಿವರಿಸಿದೆ.