1 Lakh Crore Rs. ಮೌಲ್ಯದ 112 ಹೆದ್ದಾರಿ ಯೋಜನೆಗೆ ಪಿಎಂ ಚಾಲನೆ

Team Udayavani, Mar 12, 2024, 1:02 AM IST

ಹೊಸದಿಲ್ಲಿ: ಬರೋಬ್ಬರಿ 1 ಲಕ್ಷ ಕೋಟಿ ರೂ. ವೆಚ್ಚದ 112 ರಾಷ್ಟ್ರೀಯ ಹೆದ್ದಾರಿ ಯೋಜನೆಗಳಿಗೆ ಪ್ರಧಾನಿ ನರೇಂದ್ರ ಮೋದಿ ಸೋಮವಾರ ಚಾಲನೆ ನೀಡಿದ್ದಾರೆ. ಈ ಪೈಕಿ ಕರ್ನಾಟಕಕ್ಕೆ ಸಂಬಂಧಿಸಿದ 2,750 ಕೋಟಿ ರೂ.ವೆಚ್ಚದ ಯೋಜನೆಗಳೂ ಸೇರಿವೆ.

ಮೊದಲಿಗೆ 4,100 ಕೋಟಿ ರೂ.ಗಳ ವೆಚ್ಚದಲ್ಲಿ ನಿರ್ಮಿಸಲಾಗಿರುವ ದ್ವಾರಕ ಎಕ್ಸ್‌ಪ್ರೆಸ್‌ ವೇನ ಹರ್ಯಾಣ ಸೆಕ್ಷನ್‌ ಅನ್ನು ಪ್ರಧಾನಿ ಸೋಮವಾರ ಉದ್ಘಾಟನೆ ಮಾಡಿದರು. ಈ ಹರ್ಯಾಣ ಸೆಕ್ಷನ್‌ ರಾಷ್ಟ್ರ ರಾಜಧಾನಿ ದೆಹಲಿ ಮತ್ತು ಹರಿಯಾಣದ ಗುರುಗ್ರಾಮ್‌ ನಡುವಿನ ಸಂಪರ್ಕವನ್ನು ಸುಗಮಗೊಳಿಸಲಿದೆ. ಅಲ್ಲದೇ, ಈ ಪ್ರದೇಶಗಳ ನಡುವಿನ ದಟ್ಟಣೆ ಕಡಿಮೆ ಮಾಡಿ ಪ್ರಯಾಣ ಸಮಯವನ್ನು 20 ನಿಮಿಷ ತಗ್ಗಿಸಲಿದೆ. 19 ಕಿ.ಮೀ. ವ್ಯಾಪ್ತಿಯ ಈ ಸೆಕ್ಷನ್‌ ಷಟ³ಥ ರಸ್ತೆಗಳನ್ನೊಳಗೊಂಡಿದೆ.

ಇನ್ನು ಇದೇ ವೇಳೆ 32,700 ಕೋಟಿ ರೂ.ವೆಚ್ಚದಲ್ಲಿ ವಿವಿಧ ರಾಷ್ಟ್ರೀಯ ಹೆದ್ದಾರಿ ಯೋಜನೆಗಳಿಗೆ ಪಿಎಂ ಹಸಿರು ನಿಶಾನೆ ತೋರಿದ್ದಾರೆ. ಅಲ್ಲದೇ, ನಗರ ರಸ್ತೆ ವಿಸ್ತರಣೆಗೆ ಸಂಬಂಧಿಸಿದಂತೆ 20,500 ಕೋಟಿ ರೂ.ವೆಚ್ಚದ ಯೋಜನೆಗಳಿಗೂ ಚಾಲನೆ ನೀಡಿದ್ದಾರೆ.