11,000 ಕಿ.ಮೀ. ಮಾನವ ಸರಪಳಿ; ಗಿನ್ನೆಸ್‌ ದಾಖಲೆ

Team Udayavani, Jan 22, 2017, 9:09 AM IST

ಪಟ್ನಾ: ಈ ಸಾಲಿನ ಮುಂದೆ ಎಟಿಎಂ ಎದುರು ಚಾಚಿಕೊಂಡಿದ್ದ ಕ್ಯೂ ಏನೂ ಅಲ್ಲ! ಇದು ಸುಮಾರು 11 ಸಾವಿರ ಕಿ.ಮೀ. ಉದ್ದದ ಸಾಲು! ಬಿಹಾರದಲ್ಲಿ ಪಾನ ನಿಷೇಧಕ್ಕೆ ಬೆಂಬಲ ಸೂಚಿಸಿ ರಸ್ತೆಯ ಎರಡೂ ಬದಿಯಲ್ಲಿ ಹಮ್ಮಿ ಕೊಂಡಿದ್ದ ಬೃಹತ್‌ ಮಾನವ ಸರಪಳಿ! ಸರಿ ಸುಮಾರು 3 ಕೋಟಿಗೂ ಅಧಿಕ ಮಂದಿ ರಚಿಸಿದ್ದ ಮಾನವ ಸರಪಳಿ ಈಗ ಗಿನ್ನೆಸ್‌ ಪುಟಕ್ಕೆ ದಾಖಲಾಗಿದೆ. 

2004ರಲ್ಲಿ ಬಾಂಗ್ಲಾದೇಶ ದಲ್ಲಿ ರಚನೆಗೊಂಡ 2.30 ಕೋಟಿ ಮಂದಿಯ ಮಾನವ ಸರಪಳಿ 10 ಸಾವಿರ ಕಿ.ಮೀ. ಉದ್ದ ಚಾಚಿಕೊಂಡಿತ್ತು. ಆ ದಾಖಲೆಯನ್ನು ಬಿಹಾರದ ಜನತೆ ಶನಿವಾರ ಸರಿಗಟ್ಟಿದರು. ಕಳೆದ ವರ್ಷ ಎಪ್ರಿಲ್‌ 5ರಂದು ರಾಜ್ಯದಲ್ಲಿ ಜೆಡಿಯು- ಆರ್‌ಜೆಡಿ ಸಮ್ಮಿಶ್ರ ಸರಕಾರ ಪಾನ ನಿಷೇಧ ಜಾರಿಗೊಳಿಸಿತ್ತು. ಇದಕ್ಕೆ ಪೂರಕವಾಗಿ ಸರಕಾರವೇ ಹಮ್ಮಿಕೊಂಡಿದ್ದ  ಬೃಹತ್‌ ಮಾನವ ಸರಪಳಿ ಕಾರ್ಯಕ್ರಮಕ್ಕೆ ಅಭೂತಪೂರ್ವ ಹಾಗೂ ಪಕ್ಷಾ ತೀತ ಬೆಂಬಲ ವ್ಯಕ್ತವಾಯಿತು. ಪಟ್ನಾದ ಗಾಂಧಿಮೈದಾನದಲ್ಲಿ ಬಲೂನ್‌ ಹಾರಿಸುವ ಮೂಲಕ ಸಿಎಂ ನಿತೀಶ್‌ ಕುಮಾರ್‌ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.

38 ಜಿಲ್ಲೆಯ ಹಾದಿ: ಬಿಹಾರದ ಎಲ್ಲ 38 ಜಿಲ್ಲೆ ಗಳಲ್ಲಿ ಈ ಮಾನವ ಸರಪಳಿ ಹಾದುಹೋಗಿದ್ದು ವಿಶೇಷ. 3 ಸಾವಿರ ಕಿ.ಮೀ. ರಾಷ್ಟ್ರೀಯ ಹೆದ್ದಾರಿ, 8,285 ಕಿ.ಮೀ. ರಾಜ್ಯ ಹೆದ್ದಾರಿ ಸಹಿತ ಸಣ್ಣಪುಟ್ಟ ರಸ್ತೆಗಳಲ್ಲೂ ಜನ ಕೈ ಕೈ ಹಿಡಿದು ಮದ್ಯಪಾನದ ವಿರುದ್ಧ ಜಾಗೃತಿ ಮೂಡಿಸಿದರು.