15,000 ಗಿಡ ನೆಡುವ ಶಿಕ್ಷೆ

Team Udayavani, Feb 8, 2019, 1:20 AM IST

ಹೊಸದಿಲ್ಲಿ: 2ಜಿ ಹಗರಣಕ್ಕೆ ಸಂಬಂಧಿಸಿದ ಪ್ರಕರಣದಲ್ಲಿ ಪ್ರತಿಕ್ರಿಯೆ ಸಲ್ಲಿಸುವಂತೆ ನ್ಯಾಯಾಲಯ ನೀಡಿದ್ದ ಗಡುವನ್ನು ಮೀರಿದ ಹಿನ್ನೆಲೆಯಲ್ಲಿ ಇಬ್ಬರು ವ್ಯಕ್ತಿಗಳು ಹಾಗೂ ಮೂರು ಕಂಪೆನಿಗಳಿಗೆ ಒಟ್ಟು, 15,000 ಗಿಡ ನೆಡುವಂತೆ ದಿಲ್ಲಿ ಹೈಕೋರ್ಟ್‌ ವಿಶಿಷ್ಟ ಶಿಕ್ಷೆ ನೀಡಿದೆ. 

2ಜಿ ಹಗರಣದಲ್ಲಿ ಇಬ್ಬರು ವ್ಯಕ್ತಿಗಳು ಹಾಗೂ 3 ಕಂಪೆನಿಗಳ ಖುಲಾಸೆ ಪ್ರಶ್ನಿಸಿ ಜಾರಿ ನಿರ್ದೇಶನಾಲಯ (ಇ.ಡಿ.) ಹೈಕೋರ್ಟ್‌ ಮೆಟ್ಟಿಲೇರಿತ್ತು. ಇದಕ್ಕೆ ನಿರ್ದಿಷ್ಟ ಗಡುವಿನೊಳಗೆ ಉತ್ತರಿಸುವಂತೆ ನ್ಯಾಯಾ ಲಯ ಸೂಚಿಸಿದ್ದರೂ, ಆರೋಪಿಗಳು ಪ್ರತಿಕ್ರಿಯಿಸಿರಲಿಲ್ಲ. ಕೊನೆಯ‌ ಅವಕಾಶವನ್ನೂ ಬಳಸದ ಆರೋಪಿಗಳು, ಹೆಚ್ಚು ಕಾಲಾವಕಾಶ ಕೋರಿದ್ದರಿಂದ ಅಸಮಾಧಾನಗೊಂಡ ನ್ಯಾ. ನಜ್ಮಿ ವಾಜಿರಿ, ಇವರಿಗೆ ತಲಾ 3 ಸಾವಿರ ಗಿಡ ನೆಡುವ ಶಿಕ್ಷೆ ಪ್ರಕಟಿಸಿ, ವಿಚಾರಣೆಯನ್ನು ಮಾ. 26ಕ್ಕೆ ಮುಂದೂಡಿದ್ದಾರೆ.