19 ವಿದ್ಯಾಸಂಸ್ಥೆಗಳಿಗೆ ಶ್ರೇಷ್ಠತಾ ಅರ್ಹತೆ

Team Udayavani, Dec 9, 2018, 9:00 AM IST

ನವದೆಹಲಿ: ಅಲಿಗಡ ಮುಸ್ಲಿಂ ವಿಶ್ವವಿದ್ಯಾಲಯ, ಬನಾರಸ್‌ ಹಿಂದೂ ವಿಶ್ವವಿದ್ಯಾಲಯ, ಪಂಜಾಬ್‌ ವಿಶ್ವ ವಿದ್ಯಾಲಯ ಸೇರಿದಂತೆ ದೇಶದ 19 ವಿದ್ಯಾಸಂಸ್ಥೆಗಳನ್ನು ಅತ್ಯುತ್ಕೃಷ್ಟ ಶೈಕ್ಷಣಿಕ ಸಂಸ್ಥೆಗಳೆಂಬ ಹಿರಿಮೆಗೆ ಪಾತ್ರವಾಗುವ ಅರ್ಹತೆಯುಳ್ಳ ವಿದ್ಯಾಸಂಸ್ಥೆಗಳೆಂದು ಹೆಸರಿಸಲಾಗಿದೆ.

ಭಾರತೀಯ ಚುನಾವಣಾ ಆಯೋಗದ ಮಾಜಿ ಮುಖ್ಯಸ್ಥ ಎನ್‌. ಗೋಪಾಲ ಸ್ವಾಮಿ ನೇತೃತ್ವದ ಸಮಿತಿ ಆಯ್ಕೆ ಮಾಡಿರುವ ಈ ವಿದ್ಯಾಸಂಸ್ಥೆಗಳಲ್ಲಿ 7 ಸಾರ್ವಜನಿಕ ಸಂಸ್ಥೆಗಳಾಗಿದ್ದು, 12 ಖಾಸಗಿ ಕಾಲೇಜಗಳಾಗಿವೆ. ಈ ಮೂಲಕ ದೇಶದಲ್ಲಿ ಈವರೆಗೆ ಈ ಅರ್ಹತೆ ಪಡೆದ ವಿದ್ಯಾಸಂಸ್ಥೆಗಳ ಸಂಖ್ಯೆ 29ಕ್ಕೇರಿದೆ. ಇದೇ ವರ್ಷ ಜುಲೈನಲ್ಲಿ 20 ವಿದ್ಯಾಸಂಸ್ಥೆಗಳಿಗೆ ಈ ಅರ್ಹತೆ ಸಿಕ್ಕಿತ್ತು. 2ನೇ ಪಟ್ಟಿಯನ್ನು ಕೇಂದ್ರ ಎಚ್‌ಆರ್‌ಡಿ ಇಲಾಖೆ ಒಪ್ಪಿಗೆಗಾಗಿ ಕಳುಹಿಸಲಾಗಿದೆ. 

ಹೊಸ ಪಟ್ಟಿಯಲ್ಲಿ ಯಾವುದೇ ಐಐಟಿ ವಿದ್ಯಾಸಂಸ್ಥೆಗಳನ್ನು ಪರಿಗಣಿಸಲಾಗಿಲ್ಲ. ಇನ್ನೂ ಉದಯವಾಗದೇ ಇರುವ ಏರ್‌ಟೆಲ್‌ ಸಂಸ್ಥೆಯ ಸತ್ಯಾ ಭಾರ್ತಿ ಫೌಂಡೇಷನ್‌ ಹಾಗೂ ಭಾರತೀಯ ರಿಸರ್ವ್‌ ಬ್ಯಾಂಕ್‌ನ ಮಾಜಿ ಗವರ್ನರ್‌ ರಘುರಾಮ್‌ ರಾಜನ್‌ ಅವರ ಮಾರ್ಗದರ್ಶನದಲ್ಲಿ ರೂಪುಗೊಳ್ಳಲಿರುವ ಕ್ರೆಯಾ ವಿವಿಗೆ ಅರ್ಹತೆ ನೀಡಲಾಗಿದೆ.