ದಲಿತ ಬಾಲಕಿ ಮೇಲೆ ಗ್ಯಾಂಗ್‌ ರೇಪ್‌, ವಿಡಿಯೋ : ಇಬ್ಬರು ಅರೆಸ್ಟ್‌

Team Udayavani, Aug 6, 2018, 12:22 PM IST

ಬಲ್ಲಿಯಾ, ಉತ್ತರ ಪ್ರದೇಶ : ಉತ್ತರ ಪ್ರದೇಶದ ಬಲ್ಲಿಯಾ ಜಿಲ್ಲೆಯಲ್ಲಿ  15ರ ಹರೆಯದ ದಲಿತ ಬಾಲಕಿಯ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆಸಿದವರ ಪೈಕಿ ಇಬ್ಬರನ್ನು ಪೊಲೀಸರು ಬಂಧಿಸಿದ್ದಾರೆ.

ಲಕ್ನೋದಿಂದ ಸುಮಾರು 536 ಕಿ.ಮೀ. ಪೂರ್ವದಲ್ಲಿರುವ ಬಲ್ಲಿಯಾ ಜಿಲ್ಲೆಯ ರೇವತಿ ಗ್ರಾಮದಲ್ಲಿ ಕಳೆದ ಬುಧವಾರ ಹೊಲದಲ್ಲಿದ್ದ ದಲಿತ ಬಾಲಕಿಯನ್ನು ಐವರು ಕಾಮಾಂಧರು  ಸಮೀಪದ ಗುಡಿಸಲೊಂದಕ್ಕೆ ಎಳೆದೊಯ್ದು ಆಕೆಯ ಮೇಲೆ ಅತ್ಯಾಚಾರ ನಡೆಸಿದರು ಎಂದು ಎಸ್‌ಪಿ ಶ್ರೀಪರ್ಣ ಗಂಗೂಲಿ ತಿಳಿಸಿದ್ದಾರೆ.

ಬುಧವಾರ ರೇಪ್‌ ನಡೆಸಿದವರು ಶನಿವಾರ ದಿನ ಮತ್ತೆ ಬಾಲಕಿಯ ಮೇಲೆ ಅತ್ಯಾಚಾರಕ್ಕೆ ಯತ್ನಿಸಿದ್ದರು. ರೇಪ್‌ ಕೃತ್ಯದ ವಿಡಿಯೋವನ್ನು ಇಂಟರ್‌ ನೆಟ್‌ಗೆ ಅಪ್‌ಲೋಡ್‌ ಮಾಡುತ್ತೇವೆ ಎಂದು ಹುಡುಗಿಗೆ ಬ್ಲಾಕ್‌ ಮೇಲ್‌ ಮಾಡಿ ಧಮ್‌ಕಿ ಹಾಕಿದ್ದರು ಎಂದು ಎಸ್‌ ಪಿ ತಿಳಿಸಿದರು. 

ಬಾಲಕಿಯು ತನ್ನ ಮೇಲಾದ ಗ್ಯಾಂಗ್‌ ರೇಪ್‌ ಬಗ್ಗೆ ಮನೆಯವರಿಗೆ ತಿಳಿಸಿದಳು; ತತ್‌ಕ್ಷಣವೇ ಅವರು ಪೊಲೀಸರಿಗೆ ದೂರು ನೀಡಿ ಎಫ್ಐಆರ್‌ ದಾಖಲಿಸಿದರು.