ಆಂಫಾನ್; 21ವರ್ಷಗಳ ಬಳಿಕ ಪಶ್ಚಿಮ ಬಂಗಾಳ ಮತ್ತೊಂದು ಸೂಪರ್ ಸೈಕ್ಲೊನ್ ಗೆ ಸಾಕ್ಷಿಯಾಗ್ತಿದೆ

Team Udayavani, May 18, 2020, 7:22 PM IST

Representative Image

ಕೋಲ್ಕೊತಾ: ಆಗ್ನೇಯ ಬಂಗಾಳಕೊಲ್ಲಿಯಲ್ಲಿ ಆಂಫಾನ್ ಚಂಡಮಾರುತ ಬೀಸಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಎಚ್ಚರಿಸಿದ್ದು, ಏತನ್ಮಧ್ಯೆ ಆಂಫಾನ್ ಮಹಾ ಚಂಡಮಾರುತವಾಗಿ ಪಶ್ಚಿಮಬಂಗಾಳ ಮತ್ತು ಬಾಂಗ್ಲಾದೇಶದ ಕರಾವಳಿ ಪ್ರದೇಶದ ದಿಘಾ ಮತ್ತು ಹಾಟಿಯಾ ದ್ವೀಪಪ್ರದೇಶದ ನಡುವೆ ಮೇ 20ರಂದು ಬಡಿದಪ್ಪಳಿಸುವ ಸಾಧ್ಯತೆ ಇದೆ ಎಂದು ತಿಳಿಸಿದೆ.

ಆಂಫಾನ್ ಬಂಗಾಳ ಕೊಲ್ಲಿ ಪ್ರದೇಶದಲ್ಲಿ ಭೀಕರ ಚಂಡಮಾರುತವಾಗಿ ಬೀಸುವ ಮೂಲಕ ಸೂಪರ್ ಸೈಕ್ಲೋನ್ ಆಗಿ ಭೂಮಿಗೆ ಬಡಿದಪ್ಪಳಿಸುವ ನಿರೀಕ್ಷೆ ಇದೆ ಎಂದು ಐಎಂಡಿ ಎಚ್ಚರಿಸಿದೆ. ಈ ಚಂಡಮಾರುತದಿಂದ ಬಲಸೊರ್, ಜೈಪುರ್, ಬದ್ರಕ್, ಗಂಜಾಮ್ ಪ್ರದೇಶದ ಮೇಲೆ ಭಾರೀ ಪರಿಣಾಮ ಬೀರಲಿದೆ ಎಂದು ಹೇಳಿದೆ.

ಪಶ್ಚಿಮಬಂಗಾಳದ ಕೋಲ್ಕತಾ ಜಿಲ್ಲೆ, ಹೂಗ್ಲಿ, ಹೌರಾ, ಉತ್ತರ 24ನೇ ಪರಾಗಣ್, ಪೂರ್ವ ಮೇದಿನಿಪುರ್ ಮೇಲೆ ಚಂಡಮಾರುತ ಬಡಿದಪ್ಪಳಿಸುವ ನಿರೀಕ್ಷೆ ಇದೆ ಎಂದು ಐಎಂಡಿ ಎಚ್ಚರಿಸಿದೆ. 21 ವರ್ಷಗಳ ಹಿಂದೆ ಒಡಿಶಾ ಮತ್ತು ಪಶ್ಚಿಮಬಂಗಾಳದಲ್ಲಿ ಮಹಾಚಂಡಮಾರುತ ಬಡಿದಪ್ಪಳಿಸಿತ್ತು. ಹಾನಿಗೊಂಡಿದ್ದ ಮನೆ, ರಸ್ತೆ, ಚರಂಡಿಗಳನ್ನು ಹಲವು ತಿಂಗಳ ಕಾಲ ನಿರಂತರವಾಗಿ ಕಾರ್ಯನಿರ್ವಹಿಸುವ ಮೂಲಕ ಸರಿಪಡಿಸಲಾಗಿತ್ತು ಎಂದು ವರದಿ ತಿಳಿಸಿದೆ.