ಪಾಕ್‌ನ 4 ಸೇರಿ 22 ಯೂಟ್ಯೂಬ್‌ ಚಾನೆಲ್‌ ಬ್ಲಾಕ್‌; ಕೇಂದ್ರ ಸರ್ಕಾರದಿಂದ ಆದೇಶ

Team Udayavani, Apr 6, 2022, 7:50 AM IST

ನವದೆಹಲಿ: ಸುಳ್ಳು ಸುದ್ದಿಗಳನ್ನು ಹಬ್ಬಿಸುತ್ತಿರುವ ಪಾಕಿಸ್ತಾನದ 4 ಚಾನೆಲ್‌ಗ‌ಳು ಹಾಗೂ ಭಾರತದ 18 ಯೂಟ್ಯೂಬ್‌ ಆಧರಿತ ಸುದ್ದಿವಾಹಿನಿಗಳನ್ನು ಬ್ಲಾಕ್‌ ಮಾಡುವಂತೆ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯ ಸೂಚಿಸಿದೆ.

ಕಳೆದ ವರ್ಷದ ಫೆಬ್ರವರಿಯಲ್ಲಿ ಐಟಿ ನಿಯಮಗಳು-2021 ಜಾರಿಯಾದ ಬಳಿಕ, ಭಾರತೀಯ ಯೂಟ್ಯೂಬ್‌ ಆಧರಿತ ನ್ಯೂಸ್‌ ಪಬ್ಲಿಷರ್‌ಗಳ ವಿರುದ್ಧ ಕೇಂದ್ರ ಸರ್ಕಾರ ಕ್ರಮ ಕೈಗೊಂಡಿದ್ದು ಇದೇ ಮೊದಲು.

22 ಯೂಟ್ಯೂಬ್‌ ಚಾನೆಲ್‌ಗ‌ಳು, 3 ಟ್ವಿಟರ್‌ ಖಾತೆಗಳು, ಒಂದು ಫೇಸ್‌ಬುಕ್‌ ಖಾತೆ ಮತ್ತು ಒಂದು ನ್ಯೂಸ್‌ ವೆಬ್‌ಸೈಟ್‌ ಅನ್ನು ಬ್ಲಾಕ್‌ ಮಾಡುವಂತೆ ಸೋಮವಾರವೇ ಸಚಿವಾಲಯ ಆದೇಶ ಹೊರಡಿಸಿದೆ. ಈ ಮೂಲಕ, 2021ರ ಡಿಸೆಂಬರ್‌ನಿಂದ ಈವರೆಗೆ ಕೇಂದ್ರ ಸರ್ಕಾರವು ರಾಷ್ಟ್ರೀಯ ಭದ್ರತೆ, ಸಾರ್ವಭೌಮತೆ ಮತ್ತು ಸಮಗ್ರತೆ, ಕಾನೂನು ಸುವ್ಯವಸ್ಥೆ ಇತ್ಯಾದಿಗಳ ಹೆಸರಲ್ಲಿ ಒಟ್ಟಾರೆ 78 ಯೂಟ್ಯೂಬ್‌ ಆಧರಿತ ಸುದ್ದಿವಾಹಿನಿಗಳು ಹಾಗೂ ಹಲವು ಸಾಮಾಜಿಕ ಜಾಲತಾಣಗಳ ಖಾತೆಗಳನ್ನು ನಿಷೇಧಿಸಿದಂತಾಗಿದೆ.

ಇದನ್ನೂ ಓದಿ:ಸಿಟಿ ಮಾರ್ಕೆಟ್ ಮೇಲ್ಸೇತುವೆಯಲ್ಲಿ ಅಪಘಾತ : ಟೌನ್ ಹಾಲ್ ಸುತ್ತಮುತ್ತ ಸಂಚಾರ ದಟ್ಟಣೆ

ಬ್ಲಾಕ್‌ ಆಗಿರುವ ಯೂಟ್ಯೂಬ್‌ ಚಾನೆಲ್‌ಗ‌ಳು ಸರಾಸರಿ ಸುಮಾರು 260 ಕೋಟಿ ವೀಕ್ಷಕರನ್ನು ಹೊಂದಿವೆ. ರಾಷ್ಟ್ರೀಯ ಭದ್ರತೆಯ ವಿಚಾರದಲ್ಲಿ ಅತ್ಯಂತ ಸೂಕ್ಷ್ಮವಾಗಿರುವ, ಭಾರತ ವಿರೋಧಿ ಕಂಟೆಂಟ್‌ಗಳಿರುವ, ದೇಶದ ವಿದೇಶಾಂಗ ನೀತಿಯನ್ನು ಟೀಕಿಸುವಂಥ ಸುಳ್ಳು ಸುದ್ದಿಗಳನ್ನು ಇವುಗಳು ಪ್ರಕಟಿಸುತ್ತಿದ್ದವು ಎಂದೂ ಸಚಿವಾಲಯ ಹೇಳಿದೆ.