Canada: ಮಾನವ ಕಳ್ಳಸಾಗಣೆಯಲ್ಲಿ ಕೆನಡಾದ 260 ಕಾಲೇಜು! ವಿದ್ಯಾರ್ಥಿ ವೀಸಾ ಮೂಲಕ ಆಮಿಷ

Team Udayavani, Dec 27, 2024, 8:00 AM IST

ಹೊಸದಿಲ್ಲಿ: ಕೆನಡಾದಲ್ಲಿರುವ ಕನಿಷ್ಠ 260 ಕಾಲೇಜು ಅಂತಾರಾಷ್ಟ್ರೀಯ ಮಟ್ಟದ ಮಾನವ ಕಳ್ಳಸಾಗಣೆ ಜಾಲದಲ್ಲಿ ಭಾಗಿಯಾಗಿವೆ ಎಂಬ ಆಘಾತಕಾರಿ ಸಂಗತಿ ಜಾರಿ ನಿರ್ದೇಶನಾಲಯ (ಇ.ಡಿ.) ತನಿಖೆಯಿಂದ ಬಯಲಾಗಿದೆ.

ಭಾರತದಿಂದ ತೆರಳುವ ಅಕ್ರಮ ವಲಸಿಗರನ್ನು ಅಮೆರಿಕಕ್ಕೆ ಕಳುಹಿಸಲು ಈ ಕಾಲೇಜುಗಳು ಭಾಗಿಯಾಗಿವೆ ಎಂದು ತನಿಖಾ ಸಂಸ್ಥೆ ಹೇಳಿಕೊಂಡಿದೆ.

3 ವರ್ಷಗಳ ಹಿಂದೆ ಅಕ್ರಮವಾಗಿ ಕೆನಡಾ ಮೂಲಕ ಅಮೆರಿಕಕ್ಕೆ ತೆರಳಲು ಯತ್ನಿಸಿದ್ದ ಗುಜರಾತಿ ಕುಟುಂಬದ ಮೂವರು ಚಳಿಯಿಂದಾಗಿ ಗಡಿಯಲ್ಲೇ ಮೃತಪಟ್ಟಿದ್ದರು. ಆ ಬಗ್ಗೆ ತನಿಖೆ ನಡೆಸುವ ವೇಳೆ ಈ ಅಕ್ರಮ ಜಾಲದ ಬಗ್ಗೆ ಇ.ಡಿ.ಗೆ ಮಾಹಿತಿ ಲಭಿಸಿತ್ತು. ಭಾರತದಿಂದ ಕೆನಡಾಗೆ ತೆರಳಲು ಕೇವಲ 50-60 ಲಕ್ಷ ರೂ.ಗಳಲ್ಲಿ ವಿದ್ಯಾರ್ಥಿ ವೀಸಾ ದೊರೆಯುತ್ತಿದೆ.

ಏಜೆಂಟುಗಳ ಮೂಲಕ ಈ ವೀಸಾ ಪಡೆಯಲು ಕೆನಡಾದ 260 ಕಾಲೇಜುಗಳು ಸಹಾಯ ಮಾಡಿವೆ. ಅಕ್ರಮ ವಲಸಿಗರಿಗೆ ತಮ್ಮ ಕಾಲೇಜುಗಳಲ್ಲಿ ವ್ಯಾಸಂಗ ಮಾಡಲು ವೀಸಾ ನೀಡಿವೆ. ಅಲ್ಲಿಂದ ಕಾಲೇಜಿಗೆ ತೆರಳುವ ಬದಲು ಅಮೆರಿಕಕ್ಕೆ ಅಕ್ರಮವಾಗಿ ತೆರಳುತ್ತಾರೆ ತನಿಖಾ ಸಂಸ್ಥೆ ಹೇಳಿಕೊಂಡಿದೆ.