31 Naxal ಎನ್‌ಕೌಂಟರ್‌ಗೆ 1,500 ಮಂದಿ 25 ಕಿ.ಮೀ. ಟ್ರೆಕ್‌!

Team Udayavani, Oct 6, 2024, 6:50 AM IST

ಛತ್ತೀಸ್‌ಗಢ: ದಟ್ಟಾರಣ್ಯ, 25 ಕಿ.ಮೀ. ಗುಡ್ಡಗಾಡು ಆರೋಹಣ, 10 ಕಿ.ಮೀ ಮೋಟಾರ್‌ ಸೈಕಲ್‌ ರೈಡ್‌, 1,500 ಮಂದಿ ಭದ್ರತಾ ಸಿಬಂದಿಯ 48 ಗಂಟೆಯ ಸಾಹಸ!

ಇದು ಛತ್ತೀಸ್‌ಗಢದ ಅಭುಜಮಾಡ್‌ ಅರಣ್ಯ ಪ್ರದೇಶದಲ್ಲಿ 31 ನಕ್ಸಲೀಯರನ್ನು ಸದೆಬಡಿದ ಭದ್ರತಾಪಡೆಗಳ ರೋಚಕ ಕಾರ್ಯಾಚರಣೆಯ ವಿವರ. ಹೌದು, 24 ವರ್ಷದಲ್ಲೇ ಅಂದರೆ ಛತ್ತೀಸ್‌ಗಢ ರಾಜ್ಯ ರಚನೆಯಾದ ಬಳಿಕ ಇತಿಹಾಸದಲ್ಲೇ ಮೊದಲ ಬಾರಿಗೆ ಶುಕ್ರವಾರ ಅತೀದೊಡ್ಡ ನಕ್ಸಲ್‌ ನಿಗ್ರಹ ಕಾರ್ಯಾಚರಣೆ ನಡೆಸಿ, 28 ಮಂದಿಯನ್ನು ಸದೆಬಡಿಯಲಾಗಿತ್ತು. ಶನಿವಾರ ಇನ್ನೂ ಮೂವರು ನಕ್ಸಲರ ಮೃತದೇಹ ಪತ್ತೆಯಾಗಿದ್ದು, ಈ ಮೂಲಕ ಈ ಸಂಖ್ಯೆ 31ಕ್ಕೇರಿದೆ. ಈ ದೊಡ್ಡ ಕಾರ್ಯಾಚರಣೆ ಗಾಗಿ ಭದ್ರತಾಪಡೆ ನಡೆಸಿದ ಸಾಹಸ ಎಲ್ಲರ ಹುಬ್ಬೇರಿಸುವಂತೆ ಮಾಡಿದೆ.

ಹಲವಾರು ವರ್ಷಗಳಿಂದ ಭದ್ರತಾ ಪಡೆಗೆ ಚಳ್ಳೆಹಣ್ಣು ತಿನ್ನಿಸಿದ್ದ ವಾಂಟೆಡ್‌ ನಕ್ಸಲರನ್ನೂ ಈಗ ಎನ್‌ಕೌಂಟರ್‌ ಮಾಡಲಾಗಿದೆ. ಈ ಪೈಕಿ ಸುರೇಶ್‌ ಸಾಲಾಮ್‌, ಮೀನಾ ಮಡ್ಕಮ್‌, ನಿತಿ ಅಲಿಯಾಸ್‌ ಊರ್ಮಿಳಾ ಸೇರಿ 16 ನಕ್ಸಲರ ಮೇಲೆ ಒಟ್ಟು 1.3 ಕೋಟಿ ರೂ.ಗಳ ಬಹುಮಾನ ಘೋಷಿಸಲಾಗಿತ್ತು.