ಉದ್ಯೋಗ ಕೊಡಿ; 32 ಸಾವಿರ ಹುದ್ದೆಗೆ ಬರೋಬ್ಬರಿ 32 ಲಕ್ಷ ಮಂದಿಯಿಂದ ಅರ್ಜಿ ಸಲ್ಲಿಕೆ!

Team Udayavani, Aug 21, 2019, 1:08 PM IST

ನವದೆಹಲಿ:ಸರಕಾರಿ ಉದ್ಯೋಗ ಪಡೆಯಲು ಆಕಾಂಕ್ಷಿಗಳು ಪ್ರವಾಹದ ರೀತಿ ಅರ್ಜಿ ಸಲ್ಲಿಸಿರುವ ವಿದ್ಯಮಾನ ಮಹಾರಾಷ್ಟ್ರದಲ್ಲಿ ನಡೆದಿದೆ. ಹೌದು ಮಹಾರಾಷ್ಟ್ರ ಸರಕಾರದಲ್ಲಿ ಖಾಲಿ ಇರುವ 31,888 ಹುದ್ದೆಗಳಿಗೆ ಜನವರಿಯಿಂದ ಈವರೆಗೆ ಬರೋಬ್ಬರಿ 32 ಲಕ್ಷ ಮಂದಿ ಅರ್ಜಿ ಸಲ್ಲಿಸಿದ್ದಾರಂತೆ! ಅಂದರೆ ತಲಾ ಒಂದು ಹುದ್ದೆಗೆ 100 ಜನ ಅರ್ಜಿ ಸಲ್ಲಿಸಿದಂತಾಗಿದೆ.

ಟೈಮ್ಸ್ ಆಫ್ ಇಂಡಿಯಾ ವರದಿ ಪ್ರಕಾರ, ಗ್ರಾಮೀಣಾಭಿವೃದ್ಧಿ ಇಲಾಖೆಯಲ್ಲಿ ಖಾಲಿ ಇರುವ 13,514 ಹುದ್ದೆಗಳಿಗೆ ಸಲ್ಲಿಕೆಯಾಗಿರುವ ಅರ್ಜಿಗಳ ಸಂಖ್ಯೆ 11.2 ಲಕ್ಷ! ಇದಕ್ಕಿಂತಲೂ ಹೆಚ್ಚು ಕಠಿಣ ಸ್ಪರ್ಧೆ ಇರುವುದು ಲೈವ್ ಸ್ಟಾಕ್ ಸೂಪರ್ ವೈಸರ್ಸ್ ಇಲಾಖೆಯಲ್ಲಿರುವ ಖಾಲಿ ಇರುವ 729 ಹುದ್ದೆಗಳಿಗೆ ಹಾಗೂ ಪಶುಸಂಗೋಪನಾ ಇಲಾಖೆಯಲ್ಲಿ ಖಾಲಿ ಇರುವ 452 ಹುದ್ದೆಗೆ ಬರೋಬ್ಬರಿ 3.3 ಲಕ್ಷ ಮಂದಿ ಅರ್ಜಿ ಸಲ್ಲಿಸಿರುವುದಾಗಿ ವರದಿ ವಿವರಿಸಿದೆ.

ಮಹಾರಾಷ್ಟ್ರ ಸರಕಾರದ 13 ಇಲಾಖೆಗಳಲ್ಲಿ ಒಟ್ಟು 31,888 ಹುದ್ದೆ ಖಾಲಿ ಇದೆ. ಇದರಲ್ಲಿ ಮೀನುಗಾರಿಕೆ, ಕೃಷಿ, ಪಶುಸಂಗೋಪನೆ, ಅರಣ್ಯ ಇಲಾಖೆ, ಆರ್ಥಿಕ ಇಲಾಖೆ, ಮಣ್ಣು ಮತ್ತು ನೀರು ಸಂರಕ್ಷಣಾ ಇಲಾಖೆ ಮತ್ತು ಗ್ರಾಮೀಣಾಭಿವೃದ್ಧಿ ಇಲಾಖೆ ಸೇರಿದೆ. ಇವುಗಳಲ್ಲಿ ಮುಖ್ಯವಾಗಿ ಗ್ರೇಡ್ 3 ಮತ್ತು 4ನೇ ಶ್ರೇಣಿಯ ಉದ್ಯೋಗ ಪ್ರಮುಖವಾಗಿ ಇದ್ದಿರುವುದಾಗಿ ವರದಿ ತಿಳಿಸಿದೆ.

ಲೋಕಸಭಾ ಚುನಾವಣೆಗೂ ಮುನ್ನ ಮಹಾರಾಷ್ಟ್ರದ ಮುಖ್ಯಮಂತ್ರಿ ಫಡ್ನವೀಸ್ ನೇತೃತ್ವದ ಸರಕಾರ ಶೀಘ್ರವೇ ಖಾಲಿ ಇರುವ 72 ಸಾವಿರ ಹುದ್ದೆಗಳಿಗೆ ನೇಮಕಾತಿ ಮಾಡಿಕೊಳ್ಳುವುದಾಗಿ ಘೋಷಿಸಿತ್ತು. ಮುಂದಿನ ಎರಡು ವರ್ಷಗಳಲ್ಲಿ ಖಾಲಿ ಹುದ್ದೆಗಳನ್ನು ಭರ್ತಿ ಮಾಡುವುದಾಗಿ ಹೇಳಿತ್ತು. ಏತನ್ಮಧ್ಯೆ ಮರಾಠ ಮೀಸಲಾತಿ ಪ್ರಕರಣ ಕೋರ್ಟ್ ಕಟಕಟೆಯಲ್ಲಿ ಇದ್ದಿರುವುದರಿಂದ ನೇಮಕಾತಿ ಪ್ರಕ್ರಿಯೆ ವಿಳಂಬವಾಗಿರುವುದಾಗಿ ವರದಿ ವಿವರಿಸಿದೆ.