ದೇಶದ ಶೇ.4ರಷ್ಟು ಜಿಎಸ್‌ಟಿ ತೆಲಂಗಾಣದಲ್ಲೇ ಸಂಗ್ರಹ

Team Udayavani, Jul 1, 2019, 5:42 AM IST

ಹೈದರಾಬಾದ್‌: 2018 - 19ನೇ ವಿತ್ತೀಯ ವರ್ಷದಲ್ಲಿ ತೆಲಂಗಾಣವು ಬರೋಬ್ಬರಿ 36,212 ಕೋಟಿ ಸರಕು ಮತ್ತು ಸೇವಾ ತೆರಿಗೆ(ಜಿಎಸ್‌ಟಿ) ಸಂಗ್ರಹಿಸುವ ಮೂಲಕ ಅಚ್ಚರಿ ಮೂಡಿಸಿದೆ.

ಇದು ಇಡೀ ದೇಶದ ಜಿಎಸ್‌ಟಿ ಸಂಗ್ರಹದ ಶೇ. 4ರಷ್ಟು. ಅಷ್ಟೇ ಅಲ್ಲ, ಮತ್ತೂಂದು ದಾಖಲೆ ಎಂಬಂತೆ, ಕೇವಲ ಹೈದರಾಬಾದ್‌ ವಲಯದಲ್ಲೇ ಮಾಸಿಕ ಸರಾಸರಿ ಆದಾಯ ಶೇ. 28 ರಷ್ಟು ಹೆಚ್ಚಳವಾಗಿದೆ. ಕಳೆದ ವಿತ್ತೀಯ ವರ್ಷಕ್ಕೆ ಹೋಲಿಸಿದರೆ ಇದು ದೇಶದಲ್ಲೇ ಅತ್ಯಧಿಕ ಎನ್ನಲಾಗಿದೆ. ತೆಲಂಗಾಣದಲ್ಲಿನ ತೆರಿಗೆ ದಾರರ ಪ್ರಮಾಣ ದೇಶದ ಶೇ. 3ರಷ್ಟಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಇದೇ ವೇಳೆ, ಹೈದರಾಬಾದ್‌ ವಲಯದ ಅಧಿಕಾರಿಗಳು ಜಿಎಸ್‌ಟಿಯ ಅನುಕೂಲತೆ ಯನ್ನು ಗ್ರಾಹಕರಿಗೆ ವರ್ಗಾಯಿಸದವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳುತ್ತಿದ್ದಾರೆ. ಇಲ್ಲಿ 458 ಕೋಟಿ ರೂ. ಜಿಎಸ್‌ಟಿ ವಂಚನೆಯನ್ನು ಪತ್ತೆ ಹಚ್ಚಲಾಗಿದೆ. ಈ ಪೈಕಿ 272 ಕೋಟಿ ರೂ. ವಸೂಲಿ ಮಾಡಲಾಗಿದೆ ಎಂದು ಹೈದರಾಬಾದ್‌ ಜಿಎಸ್‌ಟಿ ಪ್ರಧಾನ ಆಯುಕ್ತ ಎಂ.ಶ್ರೀನಿವಾಸ್‌ ತಿಳಿಸಿದ್ದಾರೆ.