ಹಿಂದೂಯೇತರ ಅಧಿಕಾರಿಗಳ ನೇಮಕ ವಿರುದ್ಧ ಟಿಟಿಡಿ ದೂರು

Team Udayavani, Jan 2, 2018, 9:05 AM IST

ತಿರುಪತಿ: ತಿರುಮಲ ತಿರುಪತಿ ದೇವಸ್ಥಾನಂ ಟ್ರಸ್ಟ್‌ (ಟಿಟಿಡಿ) ಆಡಳಿತಕ್ಕೊಳಪಡುವ ದೇಗುಲಗಳಲ್ಲಿ ಸರಕಾರಿ ಆದೇಶಗಳನ್ನು ಉಲ್ಲಂಘಿಸಿ ಕೆಲವು ಕ್ರೈಸ್ತ ಸಮುದಾಯದವರನ್ನು ನೇಮಕಾತಿ ಮಾಡಿರುವ ಟಿಟಿಡಿಯ ಹಿಂದಿನ ಆಡಳಿತದ ವಿರುದ್ಧ ಆಂಧ್ರಪ್ರದೇಶ ಸರಕಾರಕ್ಕೆ ದೂರು ಸಲ್ಲಿಸಲು ಟಿಟಿಡಿಯ ಈಗಿನ ಆಡಳಿತ ಮಂಡಳಿ ನಿರ್ಧರಿಸಿದೆ ಎನ್ನಲಾಗಿದೆ. 

ಟಿಟಿಡಿಯ ಉಪ ಕಾರ್ಯನಿರ್ವಾಹಕ ಅಧಿಕಾರಿಯಾಗಿರುವ ಹೇಮಲತಾ, ಟಿಟಿಡಿಯ ಅಧಿಕೃತ ವಾಹನಗಳಲ್ಲಿ ಚರ್ಚ್‌ಗಳಿಗೆ ತೆರಳುವುದರ ವಿರುದ್ಧ ಕೆಲ ಹಿಂದೂ ಸಂಘಟನೆಗಳು ಟಿಟಿಡಿಗೆ ದೂರು ಸಲ್ಲಿಸಿದ್ದವು. ಇದರನ್ವಯ ಟಿಟಿಡಿ ಇಒ ತನಿಖೆಗೆ ಆದೇಶಿಸಿದ್ದರು. ಅದರಂತೆ, ತನಿಖೆ ನಡೆಸಿರುವ ಟಿಟಿಡಿಯ ಮುಖ್ಯ ಸರ್ವೇಕ್ಷಣೆ ಹಾಗೂ ಭದ್ರತಾಧಿಕಾರಿ (ಸಿವಿಎಸ್‌ಒ) ಎ. ರವಿಕೃಷ್ಣ  ಅವರು ಟಿಟಿಡಿಯ ಕಾರ್ಯನಿರ್ವಾಹಕ (ಟಿಟಿಡಿ ಇಒ) ಅನಿಲ್‌ ಕುಮಾರ್‌ ಸಿಂಘಲ್‌ ಅವರಿಗೆ ತನಿಖಾ ವರದಿಯನ್ನು ಸಲ್ಲಿಸಿದ್ದಾರೆ. ಅದರಲ್ಲಿ, ತಿರುಮಲ ವೆಂಕಟೇಶ್ವರ ಸ್ವಾಮಿ ದೇಗುಲ ಸೇರಿದಂತೆ ಇತರ ಟಿಟಿಡಿ ದೇಗುಲಗಳಲ್ಲಿ ಹಿಂದೂಯೇತರ ಸಿಬ್ಬಂದಿ ನೇಮಕ ಮಾಡಿಕೊಳ್ಳಬಾರದೆಂದು 1988 ಹಾಗೂ 2007ರಲ್ಲಿ ಆಂಧ್ರಪ್ರದೇಶ ಸರಕಾರ ಆದೇಶ ನೀಡಿದ್ದು ಇದರ ಉಲ್ಲಂಘನೆಯಾಗಿದೆ ಎಂದಿದ್ದಾರೆ  ಎಂದು ‘ದ ನ್ಯೂ ಇಂಡಿಯನ್‌ ಎಕ್ಸ್‌ಪ್ರೆಸ್‌’ ವರದಿ ಮಾಡಿದೆ. ಕಳೆದ 25 ವರ್ಷಗಳಲ್ಲಿ 42 ಕ್ರೈಸ್ತರನ್ನು ದೇಗುಲದ ಸಿಬಂದಿಯಾಗಿ ನೇಮಿಸಿಕೊಳ್ಳಲಾಗಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ. 

ಆದೇಶ ಉಲ್ಲಂಘನೆ: 1986ರಲ್ಲಿ  ಹೇಮಲತಾ ಅವರನ್ನು ಟಿಟಿಡಿಯ ಉಪ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ನೇಮಿಸಿದ್ದಾಗ ಟಿಟಿಡಿಯಲ್ಲಿ ಹಿಂದೂಯೇತರ ನೇಮಕಾತಿಗೆ ಯಾವುದೇ ನಿರ್ಬಂಧಗಳಿರಲಿಲ್ಲ. 1988ರಲ್ಲಿ ಮೊದಲ ಬಾರಿಗೆ ಅಂಥದ್ದೊಂದು ನಿರ್ಬಂಧ ಜಾರಿಯಾಗಿತ್ತು. ಆನಂತರ, 2007ರಲ್ಲಿ ಮತ್ತೂಮ್ಮೆ ಆಂಧ್ರ ಸರಕಾರ ಇದೇ ಆದೇಶ ನೀಡಿತ್ತು. ಆದರೂ, 1988ರಿಂದ 2007ರವರೆಗೆ 35 ಕ್ರೈಸ್ತರನ್ನು, 2007ರ ನಂತರ ಈವರೆಗೆ 7 ಕ್ರೈಸ್ತರನ್ನು ಸೇವೆಗೆ ನೇಮಿಸಿಕೊಳ್ಳಲಾಗಿದೆ ಎಂದು ಸಿವಿಒಎಸ್‌ ವರದಿಯಲ್ಲಿ ಉಲ್ಲೇಖೀಸಲಾಗಿದೆ.