ಡಿಜಿಟಲ್‌ ಪಾವತಿಗೆ ಉತ್ತೇಜನ ಕೊಡದಿದ್ದರೆ 5 ಸಾವಿರ ರೂ.ದಂಡ

ವಾರ್ಷಿಕ 50 ಕೋಟಿ ರೂ.ಗಳಷ್ಟು ವ್ಯವಹಾರದ ಕಂಪನಿಗಳ ಕಡೆಗೆ ಕೇಂದ್ರದ ಅಸ್ತ್ರ

Team Udayavani, Dec 31, 2019, 10:59 PM IST

– ಡಿಜಿಟಲ್‌ ಪಾವತಿ ವ್ಯವಸ್ಥೆ ಅಳವಡಿಸಿಕೊಳ್ಳಲು ಜ. 31ರ ಗಡುವು
– ನಗದು ರಹಿತ ಪಾವತಿ ವ್ಯವಸ್ಥೆ ಅಳವಡಿಸಿಕೊಳ್ಳದ ಕಂಪನಿಗಳಿಗೆ ದಿನಕ್ಕೆ 5,000 ರೂ. ದಂಡದ ಎಚ್ಚರಿಕೆ.
– ನಗದು ರಹಿತ ವಹಿವಾಟು ಉತ್ತೇಜನಕ್ಕೆ ಹೊಸ ಆದೇಶ ಜಾರಿ

ನವದೆಹಲಿ: ನಗದು ರಹಿತ ಆರ್ಥಿಕ ವಹಿವಾಟನ್ನು ಮತ್ತಷ್ಟು ಸರ್ವವ್ಯಾಪಿಗೊಳಿಸುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ಮಹತ್ವದ ನಿರ್ಧಾರವೊಂದನ್ನು ಕೈಗೊಂಡಿದ್ದು, ವಾರ್ಷಿಕವಾಗಿ 50 ಕೋಟಿ ರೂ. ಅಥವಾ ಅದಕ್ಕಿಂತ ಹೆಚ್ಚು ವಹಿವಾಟು ನಡೆಸುವ ಕಂಪನಿಗಳು ತಮ್ಮಲ್ಲಿ ಡಿಜಿಟಲ್‌ ಪಾವತಿ ಸೌಲಭ್ಯಗಳನ್ನು 2020ರ ಜ. 31ರೊಳಗೆ ಕಡ್ಡಾಯವಾಗಿ ಅಳವಡಿಸಿಕೊಳ್ಳಬೇಕು. ಇಲ್ಲವಾದರೆ, ದಿನವೊಂದಕ್ಕೆ ಆ ಕಂಪನಿಯ ಮೇಲೆ 5,000 ರೂ. ದಂಡ ವಿಧಿಸಲಾಗುತ್ತದೆ ಎಂದು ಕಟ್ಟುನಿಟ್ಟಾದ ಆದೇಶ ನೀಡಿದೆ.

2020ರ ಫೆ. 1ರಿಂದ ಈ ಕಂಪನಿಗಳ ವ್ಯವಹಾರ ವ್ಯಾಪ್ತಿಗೆ ಬರುವ ಯಾವುದೇ ಗ್ರಾಹಕನಿಕೆ ಡಿಜಿಟಲ್‌ ಪಾವತಿಯ ಆಯ್ಕೆಯನ್ನು ಆ ಕಂಪನಿಗಳು ಕಡ್ಡಾಯವಾಗಿ ನೀಡಲೇಬೇಕಿದ್ದು, “ರುಪೇ’ ಹಾಗೂ “ಯುಪಿಐ’ ಮಾದರಿಯ ಪಾವತಿಗೆ ಹೆಚ್ಚಿನ ಆದ್ಯತೆ ನೀಡಬೇಕೆಂದು ಎಂದು ಸರ್ಕಾರ ತಾಕೀತು ಮಾಡಿದೆ.

ಈ ಸೂಚನೆಗಳನ್ನು ಒಳಗೊಂಡ ಸುತ್ತೋಲೆಯನ್ನು ಡಿ. 30ರಂದು ಕೇಂದ್ರೀಯ ನೇರ ತೆರಿಗೆಗಳ ಮಂಡಳಿ (ಸಿಬಿಡಿಟಿ) ಮೂಲಕ ಎಲ್ಲಾ ಸಂಸ್ಥೆಗಳಿಗೆ, ಕಂಪನಿಗಳಿಗೆ ರವಾನಿಸಲಾಗಿದೆ ಎಂದು “ಸಿಎನ್‌ಬಿಸಿಟಿವಿ 18′ ವರದಿ ಮಾಡಿದೆ.