ಶಿಂಧೆ ಮತ್ತೆ ಮೇಲುಗೈ ; 66 ಥಾಣೆ ಮಹಾನಗರ ಪಾಲಿಕೆ ಸದಸ್ಯರ ಬೆಂಬಲ

Team Udayavani, Jul 7, 2022, 7:36 PM IST

ಥಾಣೆ: ಉದ್ಧವ್ ಠಾಕ್ರೆ ನೇತೃತ್ವದ ಶಿವಸೇನೆ ಗುಂಪಿಗೆ ಮತ್ತೆ ಹಿನ್ನಡೆಯಾಗಿದ್ದು, ಥಾಣೆ ಮಹಾನಗರ ಪಾಲಿಕೆಯ (ಟಿಎಂಸಿ) ಪಕ್ಷದ 67 ಮಾಜಿ ಕಾರ್ಪೊರೇಟರ್‌ಗಳ ಪೈಕಿ 66 ಮಂದಿ ಮಹಾರಾಷ್ಟ್ರ ಮುಖ್ಯಮಂತ್ರಿ ಏಕನಾಥ್ ಶಿಂಧೆ ನೇತೃತ್ವದ ಬಣಕ್ಕೆ ಬೆಂಬಲ ನೀಡಿದ್ದಾರೆ. ಶಿವಸೇನೆಯ ಭದ್ರಕೋಟೆಯಾಗಿದ್ದ 131 ಸದಸ್ಯ ಬಲದ ಟಿಎಂಸಿಯ ಅಧಿಕಾರಾವಧಿಯು ಸ್ವಲ್ಪ ಸಮಯದ ಹಿಂದೆ ಕೊನೆಗೊಂಡಿತ್ತು, ಈಗ ಅದರ ಚುನಾವಣೆಗಳು ನಡೆಯಲಿವೆ.

ಮಾಜಿ ಮೇಯರ್ ನರೇಶ್ ಮ್ಹಾಸ್ಕೆ ನೇತೃತ್ವದ 66 ಮಾಜಿ ಸೇನಾ ಕಾರ್ಪೊರೇಟರ್‌ಗಳು ಬುಧವಾರ ರಾತ್ರಿ ಮುಂಬಯಿಯ ‘ನಂದನವನ’ ಬಂಗಲೆಯಲ್ಲಿ ಸಿಎಂ ಶಿಂಧೆ ಅವರನ್ನು ಭೇಟಿ ಮಾಡಿ ಅವರಿಗೆ ಬೆಂಬಲವನ್ನು ನೀಡಿದರು ಎಂದು ಶಿಂಧೆ ಅವರ ಕಚೇರಿಯ ಪ್ರಕಟಣೆ ತಿಳಿಸಿದೆ.

ಕಳೆದ ತಿಂಗಳು, ಶಿಂಧೆ ಅವರು ಸೇನೆಯ ವಿರುದ್ಧ ಬಂಡಾಯವನ್ನು ಪ್ರಾರಂಭಿಸಿದ್ದರು ಮತ್ತು ಪಕ್ಷದ ಬಹುಪಾಲು ಶಾಸಕರು ಅವರ ಪರವಾಗಿ ನಿಂತಿದ್ದರು, ಇದು ಉದ್ಧವ್ ಠಾಕ್ರೆ ನೇತೃತ್ವದ ರಾಜ್ಯದಲ್ಲಿ ಮಹಾ ವಿಕಾಸ್ ಅಘಾಡಿ ಸರ್ಕಾರ ಪತನಕ್ಕೆ ಕಾರಣವಾಗಿತ್ತು.