Tragedy: ಧಾರ್ಮಿಕ ಕಾರ್ಯಕ್ರಮ ವೇಳೆ ಮಳೆ; ಶೆಡ್‌ ಮೇಲೆ ಮರ ಬಿದ್ದು 7 ಮಂದಿ ಭಕ್ತರು ಮೃತ್ಯು

Team Udayavani, Apr 10, 2023, 9:16 AM IST

ಮಹಾರಾಷ್ಟ್ರ: ಬೃಹತ್‌ ಮರಬಿದ್ದು ಕನಿಷ್ಠ 7 ಮಂದಿ ಮೃತಪಟ್ಟು, 5 ಮಂದಿ ಗಾಯಗೊಂಡಿರುವ ಘಟನೆ ಮಹಾರಾಷ್ಟ್ರದ ಅಕೋಲಾದಲ್ಲಿ ಭಾನುವಾರ ( ಏ.9 ರಂದು) ಸಂಜೆ ನಡೆದಿರುವುದು ವರದಿಯಾಗಿದೆ.

ಅಕೋಲಾದ ಪಾರಸ್ ನಲ್ಲಿ ಧಾರ್ಮಿಕ ಕಾರ್ಯಕ್ರಮವೊಂದರಲ್ಲಿ ಭಾಗಿಯಾಗಲು ನೂರಾರು ಭಕ್ತರು ಆಗಮಿಸಿದ್ದರು. ಮಳೆ ಜೋರಾಗಿ ಬರುತ್ತಿದ್ದ ಕಾರಣ ತಗಡಿನ ಶೆಡ್‌ ನ ಕೆಳಗೆ 35 -40 ಜನರು ನಿಂತಿದ್ದರು. ಈ ವೇಳೆ ಮಳೆಯೊಟ್ಟಿಗೆ ಜೋರಾದ ಗಾಳಿಯೂ ಬೀಸಿದ ಪರಿಣಾಮ ಶೆಡ್‌ ನ ಪಕ್ಕದಲ್ಲಿದ್ದ ಬೃಹತ್‌ ಬೇವಿನ ಮರ ಶೆಡ್‌ ನ ಮೇಲೆ ಬಿದ್ದಿದೆ. ಇದರಿಂದ ಭಕ್ತರು ಅತ್ತಿತ್ತ ಓಡಿದ್ದಾರೆ. ಆದರೆ ಇದರಲ್ಲಿ 7 ಮಂದಿ ಸಾವಿಗೀಡಿದ್ದಾರೆ. 5 ಮಂದಿಗೆ ಗಾಯಗಳಾಗಿವೆ ಎಂದು ವರದಿ ತಿಳಿಸಿದೆ.

ಇದನ್ನೂ ಓದಿ: ತ್ರಿಶೂಲ ಹಿಡಿದು ಬೀದಿಗೆ ಇಳಿಯದೇ ಇದ್ದರೆ.. ಮುಸ್ಲಿಂಮರ ವಿರುದ್ಧ ಪ್ರಚೋದನಕಾರಿ ಹೇಳಿಕೆ: FIR

ಘಟನೆಯ ಬಗ್ಗೆ ಮಾಹಿತಿ ಪಡೆದ ಅಧಿಕಾರಿಗಳು ತಕ್ಷಣ ರಕ್ಷಣಾ ಕಾರ್ಯಾಚರಣೆಯನ್ನು ಆರಂಭಿಸಿದ್ದಾರೆ. ತುಂಡಾಗಿ ಬಿದ್ದ ಮರವನ್ನು ಮತ್ತು ಕುಸಿದ ಶೆಡ್ ಅನ್ನು ಮೇಲೆತ್ತಲು ಜೆಸಿಬಿ ಯಂತ್ರಗಳನ್ನು ತರಲಾಗಿದೆ. ಆ ಬಳಿಕ ಒಂದೊಂದೇ ಮೃತದೇಹ ಹಾಗೂ ಗಾಯಾಳುಗಳನ್ನು ಹೊರ ತೆಗೆಯಲಾಗಿದೆ.

ಮಹಾರಾಷ್ಟ್ರ ಉಪಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಸಾವಿಗೆ ಸಂತಾಪ ಸೂಚಿಸಿದ್ದು, ಏಕನಾಥ್ ಶಿಂಧೆ ನೇತೃತ್ವದ ಮಹಾರಾಷ್ಟ್ರ ಸರ್ಕಾರವು ಮೃತರ ಕುಟುಂಬಗಳಿಗೆ ಆರ್ಥಿಕ ನೆರವು ನೀಡಲಿದೆ ಎಂದು ಘೋಷಿಸಿದ್ದಾರೆ.