ಅಪಾಯ ತಡೆಗೆ ನಿಷೇಧಾಜ್ಞೆ

Team Udayavani, Jun 18, 2019, 5:50 AM IST

ಪಾಟ್ನಾ: ಸಾಮಾನ್ಯವಾಗಿ ಕಾನೂನು ಸುವ್ಯವಸ್ಥೆ ಹದಗೆಟ್ಟಂತಹ ಸಂದರ್ಭದಲ್ಲಿ ನಿಷೇಧಾಜ್ಞೆ ಜಾರಿಗೊಳಿಸುವುದನ್ನು ನೋಡಿರುತ್ತೀರಿ. ಆದರೆ, ಬಿಹಾರದ ಗಯಾದಲ್ಲಿ ಬಿಸಿ ಹವೆಯ ಅಬ್ಬರಕ್ಕೆ ಬೆದರಿಕೆ ಸೆಕ್ಷನ್‌ 144 ಅನ್ನು ಸರಕಾರ ಜಾರಿ ಮಾಡಿದೆ. ಹೆಚ್ಚಿನ ಸಂಖ್ಯೆಯ ಜನರು ಒಂದೇ ಕಡೆ ಸೇರುವಂತಿಲ್ಲ ಎಂಬ ಫ‌ರ್ಮಾನನ್ನು ಹೊರಡಿಸಲಾಗಿದೆ.

ಒಣ ಹವೆ ಮತ್ತು ಧೂಳಿನಿಂದ ಕೂಡಿದ ನಗರ ಎಂದೇ ಹೆಸರು ಪಡೆದಿರುವ ಗಯಾ ನಗರವು ಬಿಸಿ ಹವೆಯಿಂದ ಕಂಗೆಟ್ಟಿದೆ. ಬಿಸಿ ಗಾಳಿಗೆ ಇಲ್ಲಿ 76 ಮಂದಿ ಬಲಿಯಾಗಿದ್ದಾರೆ. ಈ ಸಾವಿನ ನರ್ತನಕ್ಕೆ ಕಡಿವಾಣ ಹಾಕುವ ಉದ್ದೇಶದಿಂದ ಇಲ್ಲಿನ ಜಿಲ್ಲಾಡಳಿತವು ಹಲವು ಕಠಿಣ ಕ್ರಮಗಳನ್ನು ಜಾರಿಗೊಳಿಸಿದೆ.
ಕೇಂದ್ರ ಆರೋಗ್ಯ ಸಚಿವ ಹರ್ಷವರ್ಧನ್‌ ಅವರೂ 76 ಮಂದಿಯ ಸಾವಿನ ಬಗ್ಗೆ ಆಘಾತ ವ್ಯಕ್ತಪಡಿಸಿದ್ದು, ಮನೆಗಳಿಂದ ಹೊರಬರದಂತೆ ಜನರಿಗೆ ಸಲಹೆ ನೀಡಿದ್ದಾರೆ.

ಏನೇನು ಕ್ರಮಗಳು?
ಬೆಳಗ್ಗೆ 11 ರಿಂದ ಸಂಜೆ 4 ಗಂಟೆಯೊಳಗಿನ ಅವಧಿಯಲ್ಲಿ ನಿರ್ಮಾಣ ಕಾಮಗಾರಿ ಸೇರಿದಂತೆ ಇತರೆ ಬಾಹ್ಯ ಚಟುವಟಿಕೆಗಳಿಗೆ ಅವಕಾಶವಿಲ್ಲ
ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿಗೆ ಸಂಬಂಧಿಸಿದ ಕೆಲಸವನ್ನೂ ಬೆಳಗ್ಗೆ 10.30ರ ನಂತರ ಮಾಡುವಂತಿಲ್ಲ
ನಿಷೇಧಾಜ್ಞೆ ಹೊರಡಿಸಲಾಗಿದ್ದು, ಹೆಚ್ಚಿನ ಜನರು ಒಂದೇ ಕಡೆ ಸೇರುವಂತಿಲ್ಲ.