ಬರೋಬ್ಬರಿ 918 ಕೆಜಿಯ ಕಿಚಡಿ ಗಿನ್ನೆಸ್‌ಗೆ ಸೇರ್ಪಡೆ

Team Udayavani, Nov 5, 2017, 6:45 AM IST

ನವದೆಹಲಿ: ಕಿಚಡಿಯನ್ನು ರಾಷ್ಟ್ರೀಯ ಆಹಾರ ಎಂದು ಘೋಷಿಸಲಾಗುವುದು ಎಂಬ ಪುಕಾರುಗಳು ಹರಿದಾಡುತ್ತಿರುವಂತೆಯೇ, ಭಾರತದ ಖ್ಯಾತ ಬಾಣಸಿಗ ಸಂಜೀವ್‌ ಕಪೂರ್‌ ಅವರು ಕಿಚಡಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿ ತಂದುಕೊಟ್ಟಿದ್ದಾರೆ. ಅದು ಹೇಗೆ ಗೊತ್ತಾ? ಬರೋಬ್ಬರಿ 918 ಕೆ.ಜಿ. ತೂಕದ ಕಿಚಡಿ ತಯಾರಿಸುವ ಮೂಲಕ!

ದೆಹಲಿಯಲ್ಲಿ ನಡೆಯುತ್ತಿರುವ ವರ್ಲ್ಡ್ ಫ‌ುಡ್‌ ಇಂಡಿಯಾ ಸಮಾವೇಶದಲ್ಲಿ ಇಷ್ಟೊಂದು ತೂಕದ ಕಿಚಡಿ ತಯಾರಿಸಿದ್ದು, ಇದೀಗ ಗಿನ್ನೆಸ್‌ ದಾಖಲೆ ನಿರ್ಮಿಸಿದೆ. ಕಪೂರ್‌ ಅವರ ಈ ಪ್ರಯತ್ನಕ್ಕೆ ಕೇಂದ್ರ ಸಚಿವೆ ಹರ್‌ಸಿಮ್ರತ್‌ ಕೌರ್‌ ಬಾದಲ್‌, ಸಾಧ್ವಿ ನಿರಂಜನ್‌ ಜ್ಯೋತಿ ಮತ್ತು ಯೋಗಗುರು ಬಾಬಾ ರಾಮ್‌ದೇವ್‌ ಸಾಥ್‌ ನೀಡಿದರು. ಒಂದು ರಾತ್ರಿಯಲ್ಲಿ ಸಂಜೀವ್‌ ಕಪೂರ್‌ ನೇತೃತ್ವದ 50 ಮಂದಿಯ ತಂಡ ಮತ್ತು ಎನ್‌ಜಿಒ ಅಕ್ಷಯ ಪಾತ್ರ ಸಹಯೋಗದಲ್ಲಿ ಈ ಕಾರ್ಯವನ್ನು ಯಶಸ್ವಿಯಾಗಿ ನೆರವೇರಿಸಲಾಯಿತು. 
ಸುಮಾರು 1000 ಲೀ. ನೀರು ಹಿಡಿಯಬಹು ದಾದಂಥ 7 ಅಡಿ ಸುತ್ತಳತೆಯ ಬಾಣಲೆಯಲ್ಲಿ ಕಪೂರ್‌ ಕಿಚಡಿ ತಯಾರಿಸಿದರು. ಬಳಿಕ ಮಾತನಾಡಿದ ಗಿನ್ನೆಸ್‌ ವಿಶ್ವ ದಾಖಲೆಯ ಪ್ರಾಜೆಕ್ಟ್ ಮ್ಯಾನೇಜರ್‌ ಪೌಲಿನಾ ಸಪಿನ್‌ಸ್ಕಾ, “918 ಕೆ.ಜಿ.ಯ ಈ ಕಿಚಡಿಯು ಗಿನ್ನೆಸ್‌ ದಾಖಲೆಯ ಪುಸ್ತಕಕ್ಕೆ ಸೇರ್ಪಡೆಯಾಗಿದೆ’ ಎಂದು ಘೋಷಿಸಿದರು.