ಯುವಕರನ್ನು ಆಕರ್ಷಿಸಲು ನಾನಾ “ರಜೆ’ಗಳ ಸುರಿಮಳೆ; ಸಾಕುಪ್ರಾಣಿಗಳ ಜತೆ ಕಾಲ ಕಳೆಯಲೂ ರಜೆ

Team Udayavani, Dec 18, 2024, 7:45 AM IST

ಹೊಸದಿಲ್ಲಿ: ಯುವಕರನ್ನು ಉದ್ಯೋಗ­ಗಳಿಗೆ ಸೆಳೆಯಲು ಹಾಗೂ ಸಂಸ್ಥೆಯಲ್ಲಿ ಉಳಿಸಿಕೊಳ್ಳುವ ಸಲುವಾಗಿ ಟೆಕ್‌ ಸಂಸ್ಥೆ­ಗಳು ಹಲವು ಹೊಸ ನೀತಿ-ನಿಯಮ­ಗಳನ್ನು ತರುತ್ತಿವೆ. ಅಜ್ಜ-ಅಜ್ಜಿರೊಂ­ದಿಗೆ, ಸಾಕುಪ್ರಾಣಿಗಳೊಂದಿಗೆ ಕಾಲ ಕಳೆಯಲು ರಜಾ, ಮಾನಸಿಕ ಆರೋಗ್ಯ ಕಾಪಿಟ್ಟುಕೊಳ್ಳಲು ರಜಾ ಹೀಗೆ ಹಲವು ರೀತಿಯಲ್ಲಿ ತಮ್ಮ ಉದ್ಯೋಗಿಗಳಿಗೆ ರಜೆಗಳ ಅವಕಾಶ ನೀಡುತ್ತಿವೆ. ಬೇಕಾದಾಗ ರಜೆಯ ಜತೆಗೆ ಅವರಿಚ್ಛೆಯ ಸ್ಥಳದಿಂದಲೇ ಕೆಲಸ ಮಾಡಲೂ ಅವ­ಕಾಶ ಕಲ್ಪಿಸಲಾಗುತ್ತಿದೆ ಎಂದು ಇತ್ತೀಚಿನ ಸಮೀಕ್ಷೆಯೊಂದು ತಿಳಿಸಿದೆ.

ದೇಶದ ಸುಮಾರು 200 ಟೆಕ್‌ ಸಂಸ್ಥೆಗಳನ್ನೊಳಗೊಂಡಂತೆ ಸಮೀಕ್ಷೆ ನಡೆಸಲಾ­ಗಿದ್ದು, ಈ ರೀತಿಯ ರಜೆಗಳು, ಕಚೇರಿ­ಗಳಲ್ಲಿ ಕೆಲಸದ ಜತೆಗೇ ಮನೋರಂಜನ ಕಾರ್ಯಕ್ರಮ ಇನ್ನಿತರ ಆಕರ್ಷಣೆ­ಗಳಿಂದ ಕಾರ್ಯಕ್ಷಮತೆ ಹೆಚ್ಚುತ್ತಿದೆ ಎನ್ನಲಾಗಿದೆ.

ಸ್ಟಾರ್ಟ್‌ಅಪ್‌ವೊಂದರ ಮಾಲಕರು ಈ ಬಗ್ಗೆ ಮಾತನಾಡಿ, “ಇಂದಿನ ಪೀಳಿಗೆಗೆ ಹೆಚ್ಚು ಭಾವನಾತ್ಮಕ ಸಹಕಾರ ಬೇಕಿರು ವುದನ್ನು ನಾನು ಅರಿತುಕೊಂಡೆ. ಅವರಿಗೆ ವೈಯಕ್ತಿಕ ಸಮಯವನ್ನು ನಾವು ಹೆಚ್ಚು ನೀಡಿದಷ್ಟು ಅವರು ಕೆಲಸದಲ್ಲಿ ಹೆಚ್ಚು ಸಕ್ರಿಯರಾಗುವುದಲ್ಲದೇ, ಶೇ.100ರಷ್ಟು ಶ್ರಮ ಹಾಕುತ್ತಾರೆ. ಹೀಗಾಗಿ ಹೆಚ್ಚು ರಜೆಗಳನ್ನು ನೀಡುತ್ತಿದ್ದೇವೆ’ ಎಂದರು.