ಸಂಸದರಿಗೆ “ಕಾಲ್‌ ಸೆಂಟರ್‌’

Team Udayavani, Dec 29, 2019, 12:08 AM IST

ಹೊಸದಿಲ್ಲಿ: ದೇಶದ ಎಲ್ಲ ಸಂಸದರಿಗೆ ಆಡಳಿತಾತ್ಮಕವಾಗಿ ನೆರವಾಗುವ ಉದ್ದೇಶದೊಂದಿಗೆ ಸಂಸತ್‌ ಭವನದಲ್ಲಿ “ಮಾಹಿತಿ ಮತ್ತು ಸಂವಹನ ಕೇಂದ್ರ’ ಎಂಬ ಕಾಲ್‌ ಸೆಂಟರ್‌ ಅನ್ನು ಆರಂಭಿಸಲಾಗಿದೆ.

ಲೋಕಸಭಾ ಸ್ಪೀಕರ್‌ ಓಂ ಬಿರ್ಲಾರವರ ಆಸ್ಥೆಯಿಂದ ಆರಂಭವಾಗಿರುವ ಈ ಕೇಂದ್ರದಿಂದ ಸಂಸದರು, ಕಲಾಪಗಳಲ್ಲಿ ಯಾವುದೇ ವಿಷಯ ಮಂಡನೆ ಮಾಡ ಬೇಕಿದ್ದಲ್ಲಿ ಅದಕ್ಕೆ ಪೂರಕವಾದ ದಾಖಲೆಗಳನ್ನು ಈ ಕಾಲ್‌ ಸೆಂಟರ್‌ನ ಸಹಾಯದಿಂದ ಪಡೆಯಬಹುದು. ಜತೆಗೆ, ಸರಕಾರದಿಂದ ತಮಗೆ ಬರಬೇಕಿರುವ ಪ್ರಯಾಣ ಭತ್ಯೆಗಳ ಸ್ಥಿತಿಗಳನ್ನು ತಿಳಿಯಬಹುದು. ಹೀಗೆ, ಆಡಳಿತಾತ್ಮಕ ವಿಚಾರ ಸೇರಿದಂತೆ ಹಲವಾರು ರೀತಿಗಳಲ್ಲಿ ಈ ಕೇಂದ್ರ ಸಂಸದರ ನೆರವಿಗೆ ಬರಲಿದೆ. ಕಳೆದ ತಿಂಗಳು, ಇದನ್ನು ಪ್ರಾಯೋಗಿಕ ವಾಗಿ ಆರಂಭಿಸಲಾಗಿದ್ದು ಅದು ಯಶಸ್ಸು ಕಂಡ ಹಿನ್ನೆಲೆಯಲ್ಲಿ ಈಗ ಪೂರ್ಣ ಪ್ರಮಾಣದಲ್ಲಿ ಇದನ್ನು ಚಾಲ್ತಿಗೆ ತರಲಾಗಿದೆ.

ಸ್ವರೂಪ ಹೇಗಿದೆ?: ಈ ಕಾಲ್‌ ಸೆಂಟರ್‌ ಸಂಸತ್‌ ಭವನದ 13ನೇ ಕೊಠಡಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದೆ. ಇದರ ಜವಾಬ್ದಾರಿ ಯನ್ನು ಮೂವರು ಅಧಿಕಾರಿಗಳಿಗೆ ವಹಿಸಲಾಗಿದೆ. ಜತೆಗೆ, ಒಬ್ಬ ಮುಖ್ಯ ಸಂಯೋಜನಾಧಿಕಾರಿ, ಅವರ ಅಧೀನದಲ್ಲಿ ಕೆಲವಾರು ಸಹ-ಸಂಯೋಜನಾಧಿಕಾರಿಗಳು, ನೋಡಲ್‌ ಅಧಿಕಾರಿಗಳು ಇದ್ದಾರೆ. ಸಂಸದರು ಕಾಲ್‌ ಸೆಂಟರ್‌ನಲ್ಲಿ ತಮಗೆ ಬೇಕಾದ ಮಾಹಿತಿಯನ್ನು ಪಡೆಯಲು ತಮ್ಮವರೇ ಆದ ವ್ಯಕ್ತಿಯೊಬ್ಬರನ್ನು ನೇಮಿಸಲು ಅವಕಾಶ ಕಲ್ಪಿಸಲಾಗಿದೆ. ಆ ವ್ಯಕ್ತಿ ಸಂಸದರ ಪರವಾಗಿ ಅಗತ್ಯ ಮಾಹಿತಿಯನ್ನು ಕಾಲ್‌ಸೆಂಟರ್‌ ಮೂಲಕ ಪಡೆಯಬಹುದು.

ಲೋಕಸಭಾ ಸ್ಪೀಕರ್‌
ಓಂ ಬಿರ್ಲಾರ ಆಶಯದಂತೆ ಕೇಂದ್ರ ಪ್ರಾರಂಭ
ಪ್ರಾಯೋಗಿಕವಾಗಿ ಯಶಸ್ಸು ಕಂಡಿದ್ದ ಕೇಂದ್ರವೀಗ ಪೂರ್ಣ ಪ್ರಮಾಣದಲ್ಲಿ ಆರಂಭ