Nanded: ಸಂಗಾತಿಯ ಅರಸುತ್ತಾ 300 ಕಿ.ಮೀ. ಸಂಚರಿಸಿದ “ಜಾನಿ’ ಎಂಬ ಹುಲಿ!

Team Udayavani, Nov 20, 2024, 7:10 AM IST

ನಾಂದೇಡ್‌: ಸಂಗಾತಿಯನ್ನು ಅರಸುತ್ತಾ, “ಜಾನಿ’ ಎಂಬ ಹೆಸರಿನ ಹುಲಿಯೊಂದು ಮಹಾರಾಷ್ಟ್ರದಿಂದ ತೆಲಂಗಾಣಕ್ಕೆ 300 ಕಿ.ಮೀ. ಪ್ರಯಾಣಿಸಿದೆ ಎಂದು ವರದಿಯಾಗಿದೆ. 6-8 ವರ್ಷ ಪ್ರಾಯದ ಜಾನಿ, ಅಕ್ಟೋಬರ್‌ 3ನೇ ವಾರದಿಂದ ಟಿಪೇಶ್ವರ್‌ ಅಭಯಾರಣ್ಯದಿಂದ ಪ್ರಯಾಣ ಪ್ರಾರಂಭಿಸಿದೆ.

ಪ್ರಯಾಣದ ಸಂದರ್ಭದಲ್ಲಿ ಕಾಡು-ಮೇಡು, ಕೃಷಿ ಭೂಮಿ, ಹೆದ್ದಾರಿಗಳನ್ನು ದಾಟಿ ಆದಿಲಾಬಾದ್‌ ಮತ್ತು ನಿರ್ಮಲ್‌ ಜಿಲ್ಲೆಗಳ ಮೂಲಕ ತೆಲಂಗಾಣದ ತಿರ್ಯಾನಿ ಪ್ರದೇಶದತ್ತ ಸಾಗುತ್ತಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಅರಣ್ಯಾಧಿಕಾರಿಗಳು, “ಚಳಿಗಾಲವು ಹುಲಿಗಳ ಸಂತಾನೋತ್ಪತ್ತಿಯ ಋತುವಾಗಿದೆ. ಈ ಸಂದರ್ಭದಲ್ಲಿ ಸಂಗಾತಿಗಳನ್ನು ಹುಡುಕುವುದು ಗಂಡು ಹುಲಿಗಳ ನೈಸರ್ಗಿಕ ಪ್ರವೃತ್ತಿ. ಆದರೆ ತನ್ನ ವಾಸಸ್ಥಳದ ಸಮೀಪ ಸೂಕ್ತ ಸಂಗಾತಿ ದೊರೆಯದಿದ್ದಲ್ಲಿ ಹುಲಿಗಳು ದೀರ್ಘ‌ ಪ್ರಯಾಣ ಕೈಗೊಳ್ಳುತ್ತವೆ’ ಎಂದಿದ್ದಾರೆ. ಸದ್ಯ ಹುಲಿಗೆ ತೊಡಿಸಿರುವ ರೇಡಿಯೋ ಕಾಲರ್‌ ಮೂಲಕ ಅದರ ಜಾಡನ್ನು ಪರಿಶೀಲಿಸಲಾಗುತ್ತಿದೆ.