ಆಧಾರ್‌ ಡೇಟಾ ಕದ್ದ ಆಂಧ್ರ ಸಂಸ್ಥೆ

Team Udayavani, Apr 15, 2019, 6:08 AM IST

ಹೈದರಾಬಾದ್‌: ಆಂಧ್ರದ ತೆಲುಗು ದೇಸಂ ಪಕ್ಷಕ್ಕೆ ಆ್ಯಪ್‌ ಅಭಿವೃದ್ಧಿಪಡಿಸಿದ ಐಟಿ ಗ್ರಿಡ್ಸ್‌ ಎಂಬ ಸಂಸ್ಥೆ ಬಳಿ 7.8 ಕೋಟಿ ಆಧಾರ್‌ ದತ್ತಾಂಶ ಇದೆ ಎಂಬುದು ತಿಳಿದುಬಂದಿದ್ದು, ಈ ಸಂಬಂಧ ಹೈದರಾಬಾದ್‌ ಪೊಲೀಸರು ಎಫ್ಐಆರ್‌ ದಾಖಲಿಸಿದ್ದಾರೆ.

ಆಂಧ್ರ ಮತ್ತು ತೆಲಂಗಾಣ ರಾಜ್ಯಗಳ ಜನರ ಆಧಾರ್‌ ದತ್ತಾಂಶವನ್ನು ಈ ಸಂಸ್ಥೆ ಹಾರ್ಡ್‌ಡಿಸ್ಕ್ ನಲ್ಲಿ ಸಂಗ್ರಹಿಸಿದ್ದು, ಇದು ಆಧಾರ್‌ ಕಾಯ್ದೆಯ ಉಲ್ಲಂಘನೆಯಾಗಿದೆ. ಈ ದತ್ತಾಂಶವನ್ನು ಸಂಸ್ಥೆಯು ಅಕ್ರಮವಾಗಿ ಕೇಂದ್ರ ಸರ್ವರ್‌ ಅಥವಾ ರಾಜ್ಯ ಸರ್ವರ್‌ನಿಂದ ಪಡೆದಿರಬಹುದು. ಪ್ರಕರಣವನ್ನು ಎಸ್‌ಐಟಿಗೆ ಹಸ್ತಾಂತರಿಸುವ ಸಾಧ್ಯತೆಯೂ ಇದೆ ಎನ್ನಲಾಗಿದೆ. ಕೆಲವೇ ದಿನಗಳ ಹಿಂದೆ ತೆಲಂಗಾಣ ಅಧಿಕಾರಿಗಳು ಐಟಿ ಗ್ರಿಡ್ಸ್‌ ಸಂಸ್ಥೆಯ ಕಚೇರಿಯಿಂದ ಹಾರ್ಡ್‌ ಡಿಸ್ಕ್ ವಶಪಡಿಸಿಕೊಂಡಿದ್ದರು. ಈ ಹಾರ್ಡ್‌ಡಿಸ್ಕ್ ಪರಿಶೀಲಿಸಿದಾಗ ಈ ಅಂಶ ಬೆಳಕಿಗೆ ಬಂದಿದೆ.