ಆಕ್ಷೇಪಾರ್ಹ ಪೋಸ್ಟ್‌: ನಟಿ ಪಾಯಲ್‌ ಬಂಧನ

Team Udayavani, Dec 15, 2019, 11:42 PM IST

ಕೋಟಾ: ಸಾಮಾಜಿಕ ಜಾಲತಾಣಗಳಲ್ಲಿ ನೆಹರೂ-ಗಾಂಧಿ ಕುಟುಂಬವನ್ನು ಅವಹೇಳನ ಮಾಡಿದ ಆರೋಪದಲ್ಲಿ ಬಾಲಿವುಡ್‌ ನಟಿ ಪಾಯಲ್‌ ರೋಹಟಗಿ ಅವರನ್ನು ರಾಜಸ್ಥಾನ ಪೊಲೀಸರು ರವಿವಾರ ವಶಕ್ಕೆ ಪಡೆದಿದ್ದಾರೆ.

ಮೋತಿಲಾಲ್‌ ನೆಹರೂ, ಜವಾಹರ್‌ಲಾಲ್‌ ನೆಹರೂ, ಇಂದಿರಾಗಾಂಧಿ ಮತ್ತು ಕುಟುಂಬದ ಇತರರ ವಿರುದ್ಧ ಆಕ್ಷೇಪಾರ್ಹ ಪೋಸ್ಟ್‌ವೊಂದಕ್ಕೆ ಸಂಬಂಧಿಸಿ ಅಕ್ಟೋಬರ್‌ನಲ್ಲೇ ಐಟಿ ಕಾಯ್ದೆಯಡಿ ಕೇಸು ದಾಖಲಾಗಿತ್ತು. ಪ್ರಸಕ್ತ ತಿಂಗಳ ಆರಂಭದಲ್ಲೇ ನಟಿಗೆ ನೋಟಿಸ್‌ ಜಾರಿ ಮಾಡಿ ಪ್ರತಿಕ್ರಿಯೆ ಕೋರಲಾಗಿತ್ತು.

ರವಿವಾರ ಅಹಮದಾಬಾದ್‌ನ ಅವರ ನಿವಾಸಕ್ಕೆ ತೆರಳಿದ ಪೊಲೀಸ್‌ ತಂಡ, ಪಾಯಲ್‌ರನ್ನು ವಶಕ್ಕೆ ಪಡೆದು, ರಾಜಸ್ಥಾನದ ಬುಂದಿಗೆ ಕರೆತಂದಿದೆ. ಈ ಮಧ್ಯೆ, ಪಾಯಲ್‌ ನಿರೀಕ್ಷಣಾ ಜಾಮೀನಿಗೆ ಅರ್ಜಿ ಸಲ್ಲಿಸಿದ್ದು, ಸೋಮವಾರ ಅದು ವಿಚಾರಣೆಗೆ ಬರಲಿದೆ.