ಬನ್ಸಾಲಿ ತಾಯಿ ಬಗ್ಗೆ ಸಿನೆಮಾ

Team Udayavani, Jan 27, 2018, 9:27 AM IST

ಹೊಸದಿಲ್ಲಿ: “ಪದ್ಮಾವತ್‌’ ಚಿತ್ರದಲ್ಲಿ ರಾಣಿ ಪದ್ಮಾವತಿಯ ಬಗ್ಗೆ ಅವಹೇಳನಕಾರಿಯಾದ ಯಾವುದೇ ಸನ್ನಿವೇಶಗಳಿಲ್ಲವೆಂದು ಈಗಾಗಲೇ ಕೆಲ ಮಾಧ್ಯಮಗಳು ವರದಿ ಮಾಡಿದ್ದರೂ, ಚಿತ್ರ ನಿರ್ದೇಶಕ ಸಂಜಯ್‌ ಲೀಲಾ ಬನ್ಸಾಲಿ ವಿರುದ್ಧ ಹಠ ಮುಂದುವರಿಸುತ್ತಿರುವ ಶ್ರೀ ರಜಪೂತ್‌ ಕರ್ಣಿ ಸೇನೆ, ಚಿತ್ರದ ನಿರ್ದೇಶಕ ಬನ್ಸಾಲಿ ಅವರ ತಾಯಿ ಲೀಲಾ ಬನ್ಸಾಲಿ ಅವರ ಬಗ್ಗೆ “ಲೀಲಾ ಕೀ ಲೀಲಾ’ ಎಂಬ ಚಿತ್ರ ಮಾಡುವುದಾಗಿ ಘೋಷಿಸಿದೆ. 

ಚಿತ್ತೋರ್‌ಗಢದಲ್ಲಿ ಗುರುವಾರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ ಕರ್ಣಿ ಸೇನೆಯ ಜಿಲ್ಲಾಧ್ಯಕ್ಷ ಗೋವಿಂದ್‌ ಸಿಂಗ್‌ ಖಾಂಗರೋಟ್‌, 15 ದಿನಗಳಲ್ಲಿ ಚಿತ್ರೀಕರಣ ಶುರುವಾಗಲಿದ್ದು, ಮುಂದಿನ ವರ್ಷ ಸಿನಿಮಾ ತೆರೆಗೆ ಬರಲಿದೆ ಎಂದರು. 

ಇನ್ನೊಂದೆಡೆ, ಹಲವಾರು ವೈರುಧ್ಯಗಳ ನಡುವೆಯೂ ಗುರುವಾರ ಬಿಡುಗಡೆ ಯಾದ “ಪದ್ಮಾವತ್‌’, ರಾಷ್ಟ್ರಾದ್ಯಂತ ಮೊದಲ ದಿನ 18 ಕೋಟಿ ರೂ. ಗಳಿಸಿದೆ. ಏತನ್ಮಧ್ಯೆ, ಪದ್ಮಾವತ್‌ ವಿರುದ್ಧದ ಪ್ರತಿಭಟನೆ ವೇಳೆ ಶಾಂತಿ ಕದಡಿದ ಆರೋಪದಡಿ ಕರ್ಣಿ ಸೇನೆಯ ರಾಷ್ಟ್ರೀಯ ಕಾರ್ಯದರ್ಶಿ ಸೂರಜ್‌ ಪಾಲ್‌ ಅಮು ಅವರನ್ನು ಗುರುವಾರ ವಿಚಾರಣೆಗೊಳ ಪಡಿಸಿದ್ದ ಪೊಲೀಸರು ಶುಕ್ರವಾರ 
ಅವರನ್ನು ಬಂಧಿಸಿರುವುದಾಗಿ ಪ್ರಕಟಿಸಿದ್ದಾರೆ.

ನಿರ್ದೇಶಕ ಬನ್ಸಾಲಿ, ನಮ್ಮ ತಾಯಿ ರಾಣಿ ಪದ್ಮಾವತಿ ಯನ್ನು ಅಪಮಾನಿಸಿದ್ದಾರೆ. ಆದರೆ, ನಾವು ಅವರ ತಾಯಿಯ ಬಗ್ಗೆ ಸಿನೆಮಾ ಮಾಡಿ ಅವರು ಹೆಮ್ಮೆಪಡುವಂತೆ ಮಾಡುತ್ತೇವೆ. ಗೋವಿಂದ್‌ ಸಿಂಗ್‌ ಖಾಂಗರೋಟ್‌, ಜಿಲ್ಲಾಧ್ಯಕ್ಷ, ಕರ್ಣಿ ಸೇನೆ (ಚಿತ್ತೋರ್‌ಗಢ ಶಾಖೆ)