MK ಅಳಗಿರಿ ಯೂ ಟರ್ನ್: ಸ್ಟಾಲಿನ್‌ ನಾಯಕತ್ವ ಒಪ್ಪುವೆ, ಪಕ್ಷ ಸೇರುವೆ

Team Udayavani, Aug 30, 2018, 3:28 PM IST

ಚೆನ್ನೈ : ಎರಡು ದಿನಗಳ ಹಿಂದೆ ಎಂ ಕೆ ಸ್ಟಾಲಿನ್‌ ಡಿಎಂಕೆ ಪಕ್ಷಾಧ್ಯಕ್ಷರಾಗಿ ಆಯ್ಕೆಯಾಗಿದ್ದಾಗ ಬೆದರಿಕೆ ಹಾಕಿದ್ದ ಸಹೋದರ ಎಂ ಕೆ ಅಳಗಿರಿ ಈಗ ತನ್ನ ರಾಗ ಬದಲಾಯಿಸಿದ್ದಾರೆ. 

ಸ್ಟಾಲಿನ್‌ ನೇತೃತ್ವದ ಡಿಎಂಕೆ ಪಕ್ಷವನ್ನು ತಾನು ಮತ್ತೆ ಸೇರಲು ಸಿದ್ಧನಿದ್ದೇನೆ ಎಂದು ಎಂದು ಈ ಹಿಂದೆ ಪಕ್ಷ ವಿರೋಧಿ ಚಟುವಟಿಕೆಗಳಿಗಾಗಿ ಉಚ್ಚಾಟಿತರಾಗಿದ್ದ ಅಳಗಿರಿ ಹೇಳಿದ್ದಾರೆ.

“ನಾವು ಡಿಎಂಕೆ ಸೇರಲು ಸಿದ್ಧರಿದ್ದೇವೆ; ಆದರೆ ಆತ (ಸ್ಟಾಲಿನ್‌) ನಮ್ಮನ್ನು ಸ್ವೀಕರಿಸಲು ಸಿದ್ಧನಿಲ್ಲ’ ಎಂದು ಅಳಗಿರಿ ಇಂದು ಮಧುರೆಯಲ್ಲಿ ಹೇಳಿದರು. 

ಸ್ಟಾಲಿನ್‌ ಎರಡು ದಿನಗಳ ಪಕ್ಷದ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದ ಸಂದರ್ಭದಲ್ಲೇ ಅಳಗಿರಿ “ನನ್ನನ್ನು ಪಕ್ಷಕ್ಕೆ ಸೇರಿಸಿಕೊಳ್ಳದಿದ್ದರೆ ಅದರ ಪರಿಣಾಮವನ್ನು ಪಕ್ಷ ಎದುರಿಸಬೇಕಾದೀತು’ ಎಂಬ ಎಚ್ಚರಿಕೆ ನೀಡಿದ್ದರು. 

ಈ ಹಿಂದೆ ಅಳಗಿರಿ, “ಸ್ಟಾಲಿನ್‌ ಪಕ್ಷದ ಕಾರ್ಯಾಧ್ಯಕ್ಷರಾಗಿರುವ ಹೊರತಾಗಿಯೂ ಕಾರ್ಯವೆಸಗುತ್ತಿಲ್ಲ’ ಎಂದು ಟೀಕಿಸಿದ್ದರು. ಇದೀಗ ಅಳಗಿರಿ “ಸೆ.5ರಂದು ರಾಲಿ ಯಲ್ಲಿ ಸೇರುವ ಪಕ್ಷದ ಎಲ್ಲ ಜಿಲ್ಲಾ ಕಾರ್ಯದರ್ಶಿಗಳೊಂದಿಗೆ ಸಮಾಲೋಚಿಸಿ ಮುಂದಿನ ಕಾರ್ಯತಂತ್ರವನ್ನು ರೂಪಿಸುತ್ತೇನೆ’ ಎಂದು ಹೇಳಿದ್ದಾರೆ.