ಮೋದಿ, ಕೇಜ್ರಿವಾಲ್‌ ವಿರುದ್ಧ ಅಣ್ಣಾ ಕಿಡಿ

Team Udayavani, Oct 3, 2017, 6:20 AM IST

ಹೊಸದಿಲ್ಲಿ: 2011ರಲ್ಲಿ ಭ್ರಷ್ಟಾಚಾರದ ವಿರುದ್ಧ ರಣಕಹಳೆ ಮೊಳಗಿಸಿ ಹೊಸ ಕ್ರಾಂತಿ ಮೂಡಿಸಿದ್ದ ಗಾಂಧಿವಾದಿ ಅಣ್ಣಾ ಹಜಾರೆ ಅವರು ಮತ್ತೂಂದು ಸುತ್ತಿನ ಚಳವಳಿಗೆ ಮುಂದಾಗಿದ್ದಾರೆ. ಪ್ರಸಕ್ತ ವರ್ಷಾಂತ್ಯದಲ್ಲಿ ಅಥವಾ ಮುಂದಿನ ವರ್ಷದ ಆರಂಭದಲ್ಲಿ ಮತ್ತೆ ಪ್ರತಿಭಟನೆ ಆರಂಭಿಸುವುದಾಗಿ ಅಣ್ಣಾ ಹೇಳಿದ್ದಾರೆ.

ಗಾಂಧಿ ಜಯಂತಿಯ ದಿನವಾದ ಸೋಮವಾರ ದೆಹಲಿಯಲ್ಲಿ ಮಾತನಾಡಿದ ಅವರು, ಪ್ರಧಾನಿ ಮೋದಿ ಹಾಗೂ ದೆಹಲಿ ಸಿಎಂ ಕೇಜ್ರಿವಾಲ್‌ ವಿರುದ್ಧ ಕಿಡಿಕಾರಿದ್ದು ಕಂಡುಬಂತು. “ಮೋದಿ ಅವರು ಲೋಕ ಪಾಲ ನೇಮಕ ಹಾಗೂ ಭ್ರಷ್ಟಾಚಾರ ಮುಕ್ತ ದೇಶ ನಿರ್ಮಿಸುವಲ್ಲಿ ವಿಫ‌ಲರಾಗಿದ್ದಾರೆ. ಮೋದಿ ಅವರಿಗೆ ಲೋಕಪಾಲರ ನೇಮಕ ಬೇಕಿಲ್ಲ. ಅವರು ಗುಜರಾತ್‌ ಸಿಎಂ ಆಗಿದ್ದಾ ಗಲೂ ರಾಜ್ಯದಲ್ಲಿ ಲೋಕಾಯುಕ್ತ  ನೇಮಕ ಮಾಡಲಿಲ್ಲ. ಅದಕ್ಕಾಗಿ ಅವರು ಹೈಕೋರ್ಟ್‌, ಸುಪ್ರೀಂ ವರೆಗೆ ಹೋದರು,’ ಎಂದು ಅಣ್ಣಾ ಆರೋಪಿಸಿದರು.

ಇನ್ನು ಕೇಜ್ರಿವಾಲ್‌ ಅವರು ಸಿಎಂ ಆದ ಮೇಲೆ ಲೋಕಪಾಲ ಚಳವಳಿಯನ್ನೇ ಮರೆತರು. ಈಗ ನಾನು ಕೈಗೊಳ್ಳುವ ಪ್ರತಿ ಭಟನೆಗೆ ಬರುವಂತೆ ನಾನು ಆಹ್ವಾನ ನೀಡುವುದಿಲ್ಲ. ಒಂದು ವೇಳೆ ತಾವಾಗಿಯೇ ಬರುತ್ತೇನೆ ಎಂದರೂ ದೂರವಿರುವಂತೆ ಸೂಚಿಸುತ್ತೇನೆ ಎಂದರು ಅಣ್ಣಾ. ಇದೇ ವೇಳೆ, ಕೇಂದ್ರ ಸಚಿವ ವಿ.ಕೆ.ಸಿಂಗ್‌, ಪುದುಚೇರಿ ಲೆ.ಗ. ಕಿರಣ್‌ ಬೇಡಿ ಕೂಡ ರಾಜಕೀಯಕ್ಕೆ ಧುಮುಕಿ ಚಳವಳಿಗೆ ಎಳ್ಳು ನೀರು ಬಿಟ್ಟರು ಎನ್ನುತ್ತಾ ಅವರ ವಿರುದ್ಧವೂ ಹರಿಹಾಯ್ದರು.