ಸಮರ ಸನ್ನದ್ಧತೆ ವೀಡಿಯೋ ಹರಿಬಿಟ್ಟ ನೌಕಾಪಡೆ

Team Udayavani, Oct 24, 2020, 9:33 AM IST

ಹೊಸದಿಲ್ಲಿ: ಭಾರತ- ಚೀನ ಉದ್ವಿಗ್ನತೆ ನಡುವೆ ಭಾರತೀಯ ನೌಕಾಪಡೆ “ಹಡಗು ನಿರೋಧಕ ಕ್ಷಿಪಣಿ’ ಯನ್ನು ಯಶಸ್ವಿಯಾಗಿ ಪರೀಕ್ಷಿಸಿದೆ.

ಸಮರಾಭ್ಯಾಸದ ಭಾಗವಾಗಿ ಮುಳುಗುತ್ತಿರುವ ಹಡಗೊಂದಕ್ಕೆ ಅತ್ಯಂತ ನಿಖರವಾಗಿ ದಾಳಿ ಮಾಡಿರುವ ಕ್ಷಿಪಣಿ ಪರೀಕ್ಷೆಯ ವಿಡಿಯೋವನ್ನು ನೌಕಾಪಡೆ ಟ್ವಿಟರ್ ನಲ್ಲಿ ಪೋಸ್ಟ್‌ ಮಾಡಿದೆ. ಈ ಮೂಲಕ ನೌಕಾಪಡೆಯ ಸಮರ ಸನ್ನದ್ಧತೆಯನ್ನು ಪ್ರದರ್ಶಿಸಿದೆ.

ಅರಬ್ಬೀ ಸಮುದ್ರದಲ್ಲಿ ಮಧ್ಯಮ ಗಾತ್ರದ ಸಮರ ನೌಕೆ ಐಎನ್‌ಎ ಪ್ರಬಲ್ ಮೂಲಕ ಚಿಮ್ಮಿದ ಕ್ಷಿಪಣಿ ಗರಿಷ್ಠ ದೂರದಲ್ಲಿ ಮುಳುಗುತ್ತಿದ್ದ ಹಡಗನ್ನು ಯಶಸ್ವಿಯಾಗಿ ಟಾರ್ಗೆಟ್‌ ಮಾಡಿದೆ.

ಇದನ್ನೂ ಓದಿ:ಲಸಿಕೆ ವಿತರಣೆಗೆ ಯೋಜನೆ; ಆದ್ಯತಾ ವಲಯ ಗುರುತಿಸಿರುವ ಕೇಂದ್ರ

ನೌಕಾ ಸಿಬ್ಬಂದಿ ಮುಖ್ಯಸ್ಥ ಅಡ್ಮಿರಲ್‌ ಕರಂಬೀರ್‌ ಸಿಂಗ್‌ ಮಂಗಳವಾರ ವಷ್ಟೇ ಸಮುದ್ರ ತೀರ ಸನಿಹದ ಪ್ರದೇಶಗಳಲ್ಲಿನ ಕಾರ್ಯಾಚರಣೆ ಸಿದ್ಧತೆ ಬಗ್ಗೆ ಪರಿಶೀಲಿಸಿದ್ದರು. ಇದರ ಬೆನ್ನಲ್ಲೇ ಈ ಪರೀಕ್ಷೆ ನಡೆದಿದೆ.

Anti Ship Missile successfully launched by @indiannavy Missile Corvette #INSPrabal pic.twitter.com/gSwYjerNDu

— DD News (@DDNewslive) October 23, 2020

ಲಡಾಖ್‌ ಬಿಕ್ಕಟ್ಟು ತೀವ್ರಗೊಳ್ಳುತ್ತಿದ್ದಂತೆ ಇತ್ತ ನೌಕಾಪಡೆ ಸಮುದ್ರ ವ್ಯಾಪ್ತಿಯಲ್ಲಿ ನಿರಂತರ ಐಎನ್‌ಎಸ್‌ ವಿಕ್ರಮಾದಿತ್ಯ ಮತ್ತು ಇತರೆ ಯುದ್ಧನೌಕೆಗಳ ನೇತೃತ್ವದಲ್ಲಿ ನಿರಂತರ ಸಮರಾಭ್ಯಾಸ ನಡೆಸುತ್ತಲೇ ಬಂದಿದೆ.