ಸಿಕ್ಖ್ ವಿರೋಧಿ ದಂಗೆ ನಡೆದಿದ್ದಾಯ್ತು, ಏನೀಗ?

Team Udayavani, May 11, 2019, 6:00 AM IST

ಹೊಸದಿಲ್ಲಿ: ಸುಮಾರು 17 ಸಾವಿರದಷ್ಟು ಜನರ ಮಾರಣಹೋಮಕ್ಕೆ ಕಾರಣವಾದ ಸಿಕ್ಖ್ ವಿರೋಧಿ ದಂಗೆ ಕುರಿತು ಹಗುರವಾಗಿ ಮಾತನಾಡುವ ಮೂಲಕ ಕಾಂಗ್ರೆಸ್‌ನ ಹಿರಿಯ ನಾಯಕ ಸ್ಯಾಮ್‌ ಪಿತ್ರೋಡಾ ವಿವಾದದ ಬಿರುಗಾಳಿ ಎಬ್ಬಿಸಿದ್ದಾರೆ.

ಸುದ್ದಿಸಂಸ್ಥೆ ಎಎನ್‌ಐ ಜತೆಗೆ ಮಾತನಾಡುವ ವೇಳೆ ಸಿಕ್ಖ್ ವಿರೋಧಿ ದಂಗೆಯನ್ನು ಪ್ರಸ್ತಾವಿಸುತ್ತಾ, ‘1984ರಲ್ಲಿ ನರಮೇಧ ನಡೆದಿದ್ದು ಹೌದು, ಏನೀಗ’ ಎಂದು ಪ್ರಶ್ನಿಸುವ ಮೂಲಕ ವ್ಯಾಪಕ ಆಕ್ರೋಶಕ್ಕೆ ಪಿತ್ರೋಡಾ ಕಾರಣರಾಗಿದ್ದಾರೆ. ಈ ಹೇಳಿಕೆಯನ್ನೇ ಇಟ್ಟುಕೊಂಡು ಪ್ರಧಾನಿ ಮೋದಿ ಸಹಿತ ಬಿಜೆಪಿಯ ನಾಯಕರು ಕಾಂಗ್ರೆಸ್‌ ವಿರುದ್ಧ ಟೀಕಾಸ್ತ್ರ ಪ್ರಯೋಗಿಸಿದರೆ, ಅಕಾಲಿ ದಳದ ನಾಯಕರಾದ ಸುಖ್‌ಬೀರ್‌ ಸಿಂಗ್‌ ಬಾದಲ್, ಹರ್‌ಸಿಮ್ರತ್‌ ಕೌರ್‌ ಮತ್ತಿತರರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ದಿಲ್ಲಿ ಬಿಜೆಪಿ ವಕ್ತಾರ ತೇಜೀಂದರ್‌ ಸಿಂಗ್‌ ಬಗ್ಗಾ ಅವರು ಪಿತ್ರೋಡಾ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದು, ಸಿಖVರ ಭಾವನೆಗಳಿಗೆ ಧಕ್ಕೆ ತಂದ ಆರೋಪ ಹೊರಿಸಿದ್ದಾರೆ. ಈ ಎಲ್ಲ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ, ವಿವಾದದಿಂದ ದೂರವುಳಿಯಲು ಕಾಂಗ್ರೆಸ್‌ ಯತ್ನಿಸಿದೆ. ಅದು ಅವರ ವೈಯಕ್ತಿಕ ಹೇಳಿಕೆಯಾಗಿದ್ದು, ಅದಕ್ಕೂ ಪಕ್ಷಕ್ಕೂ ಸಂಬಂಧವಿಲ್ಲ ಎಂದಿದೆ. ಜತೆಗೆ ನಾವು ಸಂತ್ರಸ್ತರಿಗೆ ನ್ಯಾಯ ಸಿಗಬೇಕೆಂದು ಬಯಸುತ್ತೇವೆ ಎಂದೂ ತಿಳಿಸಿದೆ. ಇದೇ ವೇಳೆ, ಮಾತನಾಡುವಾಗ ಜಾಗೃತರಾಗಿರಿ ಎಂದು ಇತರ ನಾಯಕರಿಗೆ ಸೂಚಿಸಿದೆ.