US Polls: ಕಮಲಾ ಗೆಲುವಿಗಾಗಿ ಪೂರ್ವಿಕರ ಗ್ರಾಮದಲ್ಲಿ ಅರ್ಚನೆ, ಅಭಿಷೇಕ!

Team Udayavani, Nov 6, 2024, 4:58 AM IST

ಚೆನ್ನೈ: ಅತ್ತ ಅಮೆರಿಕದಲ್ಲಿ ಹೊಸ ಅಧ್ಯಕ್ಷರ ಆಯ್ಕೆಗೆ ಚುನಾವಣೆ ನಡೆಯುತ್ತಿದ್ದರೆ, ಇತ್ತ ಡೆಮಾಕ್ರಾಟ್‌ ಪಕ್ಷದ ಅಧ್ಯಕ್ಷೀಯ ಅಭ್ಯರ್ಥಿ ಕಮಲಾ ಹ್ಯಾರಿಸ್‌ ಗೆಲುವು ಸಾಧಿಸಲಿ ಎಂದು ಭಾರತದ ತಮಿಳುನಾಡಿನಲ್ಲಿ ಅಭಿಷೇಕ, ಅರ್ಚನೆ, ಹೋಮ ಹವನಗಳು ನಡೆಯುತ್ತಿವೆ!

ಹೌದು, ಕಮಲಾ ಗೆಲುವಿಗಾಗಿ ತಮಿಳುನಾಡಿನ ಅವರ ಪೂರ್ವಿಕರ ಗ್ರಾಮದಲ್ಲಿ ಮಂಗಳವಾರ ವಿಶೇಷ ಪೂಜೆ ನಡೆಸಲಾಗಿದೆ. ತಿರುವಾರೂರ್‌ ಜಿಲ್ಲೆಯ ತುಳಸೇಂದ್ರಪುರದಲ್ಲಿ ಕಮಲಾ ಪೂರ್ವಿಕರು ವಾಸವಿದ್ದರು.

ಮಂಗಳವಾರ ಇಲ್ಲಿನ ಶ್ರೀ ಧರ್ಮಶಾಸ್ತಾ ದೇವಾಲಯದಲ್ಲಿ ಕಮಲಾ ಗೆಲುವಿಗಾಗಿ ವಿಶೇಷ ಪೂಜೆ ಏರ್ಪಡಿಸಲಾಗಿತ್ತು. ಜತೆಗೆ, ಗ್ರಾಮಸ್ಥರೆಲ್ಲ ಸೇರಿ ದೇವರಿಗೆ ಅಭಿಷೇಕ, ಅರ್ಚನೆಯನ್ನೂ ಮಾಡಿದ್ದಾರೆ. ಕಮಲಾ ಅವರ ಅಜ್ಜ ಹಾಗೂ ಭಾರತೀಯ ರಾಯಭಾರಿ ಪಿ.ವಿ.ಗೋಪಾಲನ್‌ ತುಳಸೇಂದ್ರಪುರದ ವರಾಗಿದ್ದರು. ಕಮಲಾ ತಾಯಿ ಶ್ಯಾಮಲಾ ಅವರು ಗೋಪಾಲನ್‌ರ ಮಗಳು. 2020ರಲ್ಲಿ ಕಮಲಾ ಅಮೆರಿಕ ಉಪಾಧ್ಯಕ್ಷೆಯಾದಾಗಲೂ ಈ ಗ್ರಾಮ ಖ್ಯಾತಿ ಪಡೆದಿತ್ತು.