ಮೇಜರ್‌ ವಿರುದ್ಧ ಶಿಸ್ತುಕ್ರಮ

Team Udayavani, Aug 28, 2018, 6:00 AM IST

ನವದೆಹಲಿ/ಶ್ರೀನಗರ: ಶ್ರೀನಗರದ ಹೋಟೆಲ್‌ ಒಂದರಲ್ಲಿ ಸ್ಥಳೀಯ ಯುವತಿಯೊಂದಿಗೆ ಕಾಣಿಸಿಕೊಂಡಿದ್ದ ಮೇಜರ್‌ ಲೀತುಲ್‌ ಗೊಗೋಯ್‌ ವಿರುದ್ಧ ಶಿಸ್ತು ಕ್ರಮಕ್ಕೆ ಸೇನೆ ಆದೇಶಿಸಿದೆ. ಕಾರ್ಯಾಚರಣಾ ಪ್ರದೇಶ ಗಳಲ್ಲಿ ಸ್ಥಳೀಯರೊಂದಿಗೆ ಸಂಪರ್ಕ ಸಾಧಿಸಬಾರದು ಎಂಬ ಸೇನಾ ನಿಯಮ ಉಲ್ಲಂ ಸಿದ ಕಾರಣಕ್ಕಾಗಿ ಮೇಜರ್‌ ಗೊಗೋಯ್‌ ಅವರನ್ನು ದೋಷಿ ಎಂದು ಸೇನಾ ಕೋರ್ಟ್‌ ಹೇಳಿದೆ.

ಮೇ 23ರಂದು 18 ವರ್ಷದ ಯುವತಿಯೊಂದಿಗೆ ಗೊಗೋಯ್‌ ಹೊಟೇಲ್‌ ಪ್ರವೇಶಿಸಲು ಪ್ರಯತ್ನಿಸುತ್ತಿದ್ದರೆನ್ನಲಾದ ವೇಳೆ ಪೊಲೀಸರು ಬಂಧಿಸಿದ್ದರು. ಗೊಗೋಯ್‌ ತಪ್ಪು ಮಾಡಿರುವುದು ಸಾಬೀತಾದರೆ ಅವರಿಗೆ ತಕ್ಕ ಶಿಕ್ಷೆ ನೀಡಲಾಗುತ್ತದೆ ಎಂದು ಇತ್ತೀಚೆಗೆ ಸೇನಾ ಮುಖ್ಯಸ್ಥ ಬಿಪಿನ್‌ ರಾವತ್‌ ಅವರು ಶ್ರೀನಗರ ಭೇಟಿ ವೇಳೆ ಹೇಳಿದ್ದರು. ಈ ಹಿಂದೆ ಏಪ್ರಿಲ್‌ 9ರಂದು ಶ್ರೀನಗರ ಲೋಕಸಭಾ ಉಪ ಚುನಾವಣೆ ವೇಳೆ ಕಲ್ಲುತೂರಾಟಗಾರರಿಂದ ರಕ್ಷಣೆಗಾಗಿ ಯುವಕನೊಬ್ಬನನ್ನು ಜೀಪಿಗೆ ಕಟ್ಟಿದ ಕಾರಣಕ್ಕೆ ಗೊಗೋಯ್‌ ಸುದ್ದಿಗೆ ಗ್ರಾಸವಾಗಿದ್ದರು. ಗೊಗೋಯ್‌ ಅವರ ಈ ಕ್ರಮ ಸೇನೆಯಿಂದ ಶ್ಲಾಘನೆಗೆ ಒಳಗಾಗಿತ್ತು, ಅವರು ಗೌರವಕ್ಕೂ ಪಾತ್ರರಾಗಿದ್ದರು.