ದಿಲ್ಲಿಯಲ್ಲಿ ಮಹಿಳೆಯನ್ನು ಇರಿದು ಕೊಂದಾತ ಮುಂಬಯಿ ಬಾಂದ್ರಾದಲ್ಲಿ ಸರೆ

Team Udayavani, Jul 8, 2017, 4:38 PM IST

ಹೊಸದಿಲ್ಲಿ : ಗಗನ ಪರಿಚಾರಿಕೆಯಾಗುವ ಹಂಬಲ ಹೊಂದಿದ್ದ  ರಿಯಾ ಗೌತಮ್‌ ಎಂಬಾಕೆಯನ್ನು ಇರಿದು ಕೊಂದ 22ರ ಹರೆಯದ ಆರೋಪಿ ಆದಿಲ್‌ ಖಾನ್‌ ಎಂಬಾತನನ್ನು ದಿಲ್ಲಿ ಮತ್ತು ಮುಂಬಯಿ ಪೊಲೀಸ್‌ ಕ್ರೈಂ ಬ್ರಾಂಚ್‌ ನ ಜಂಟಿ ತಂಡದವರು ಇಂದು ಶನಿವಾರ ಮುಂಬಯಿಯ ಬಾಂದ್ರಾದಲ್ಲಿನ ಆತನ ಸಂಬಂಧಿಕರ ಮನೆಯಲ್ಲಿ ಬಂಧಿಸಿದ್ದಾರೆ. 

ಪೂರ್ವ ದಿಲ್ಲಿಯ ಶಹ್‌ದಾರಾ ಪ್ರದೇಶದಲ್ಲಿನ ರಾಮನಗರದಲ್ಲಿರುವ ರಿಯಾ ಗೌತಮ್‌ ಳ ಮನೆಯಿಂದ ಕೇವಲ 100 ಮೀಟರ್‌ ದೂರದಲ್ಲಿ ಆಕೆಯನ್ನು ಆರೋಪಿ ಆದಿಲ್‌ ಖಾನ್‌ ಮೊನ್ನೆ ಜು.5ರ ಬುಧವಾರ ಸಂಜೆ 5.30ರ ಹೊತ್ತಿಗೆ ನಡು ರಸ್ತೆಯಲ್ಲೇ ಇರಿದು ಕೊಂದಿದ್ದ. ಆದಿಲ್‌ ನನ್ನ ಬೆನ್ನಿಗೆ ಬಿದ್ದು ನನಗೆ  ಕಿರುಕುಳ ಕೊಡುತ್ತಿದ್ದಾನೆ ಎಂದು ರಿಯಾ ಪೊಲೀಸರಿಗೆ ಈ ಮೊದಲು ದೂರು ನೀಡಿದ್ದಳು. 

ಪರಿಸರದ ನಿವಾಸಿ 12ರ ಹರೆಯದ ಪಿಯೂಶ್‌ ಶರ್ಮಾ, ಆದಿಲ್‌ ರಿಯಾಳನ್ನು ಇರಿದು ಕೊಲ್ಲುವುದನ್ನು ಕಂಡಿದ್ದ. ಇರಿತದಿಂದ ತೀವ್ರವಾಗಿ ಗಾಯಗೊಂಡು ತೇಜ್‌ ಬಹಾದ್ದೂರ್‌ ಆಸ್ಪತ್ರೆಗೆ ದಾಖಲಿಸಲ್ಪಟ್ಟಿದ್ದ ರಿಯಾ ಗುರುವಾರ ಕೊನೆಯುಸಿರೆಳೆದಿದ್ದಳು.