ನನ್ನ ಮೇಲೆ ದಾಳಿ ನಡೆಸಿದವರು ಬಿಜೆಪಿ, ಆರ್‌ಎಸ್‌ಎಸ್‌ ನವರು :ರಾಹುಲ್‌

Team Udayavani, Aug 5, 2017, 12:10 PM IST

ಹೊಸದಿಲ್ಲಿ : “ನನ್ನ ಕಾರಿನ ಮೇಲೆ ದಾಳಿ ನಡೆಸಿದವರು ಬಿಜೆಪಿಗಳು ಮತ್ತು ಆರ್‌ಎಸ್‌ಎಸ್‌ ನವರು’ ಎಂದು ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ನೇರವಾಗಿ ಆರೋಪಿಸಿದ್ದಾರೆ. 

ನಿನ್ನೆ ಗುಜರಾತ್‌ನಲ್ಲಿ ಪ್ರವಾಹ ಸಂತ್ರಸ್ತರನ್ನು ಭೇಟಿಯಾಗಿ ಸಾಂತ್ವನ ಹೇಳಲು ತೆರಳಿದ್ದ ರಾಹುಲ್‌ ಗಾಂಧಿ ಅವರಿಗೆ ಬನಾಸ್‌ಕಾಂತಾ ಜಿಲ್ಲೆಯಲ್ಲಿನ ಧನೇರಾ ಎಂಬಲ್ಲಿ ನೆರೆದಿದ್ದ ಜನರು ಕರಿಪತಾಕೆ ತೋರಿಸಿ ಪ್ರಧಾನಿ ನರೇಂದ್ರ ಮೋದಿ ಪರ ಘೋಷಣೆಗಳನ್ನು ಕೂಗಿದ್ದರು. 

ಇದರಿಂದ ವಿಚಲಿತರಾಗಿದ್ದ ರಾಹುಲ್‌, ಸಭೆಯನ್ನು ಉದ್ದೇಶಿಸಿ ಮಾತನಾಡದೇ ಅಲ್ಲಿಂದ ತಮ್ಮ ಕಾರಿನಲ್ಲಿ ನಿರ್ಗಮಿಸುವಾಗ ಅವರ ಕಾರಿನ ಮೇಲೆ ಕಲ್ಲೆಸೆಯಲಾಗಿತ್ತು. 

ಈ ಘಟನೆಗೆ ಇಂದು ಪ್ರತಿಕ್ರಿಯಿಸಿದ ರಾಹುಲ್‌ ಗಾಂಧಿ, “ನನ್ನ ಮೇಲೆ ದಾಳಿ ನಡೆಸಿದವರು ಬಿಜೆಪಿಗಳು ಮತ್ತು ಆರ್‌ಎಸ್‌ಎಸ್‌ನವರು. ಇದು ಪ್ರಧಾನಿ ಮೋದಿ ಅವರ ರಾಜಕೀಯ ಶೈಲಿ’ ಎಂದು ಆಕ್ರೋಶ ವ್ಯಕ್ತಪಡಿಸಿದರು. 

ಈ ದಾಳಿ ಕೃತ್ಯವನ್ನು ಬಿಜೆಪಿ ಜನರೇ ಮಾಡಿದ್ದಾರೆ; ಹಾಗಿರುವಾಗ ಬಿಜೆಪಿ ನಾಯಕರು ಅವರನ್ನು ಖಂಡಿಸುತ್ತಾರೆಯೇ ಎಂದು ರಾಹುಲ್‌ ಪ್ರಶ್ನಿಸಿದರು. 

“ದಾಳಿ ಕೃತ್ಯವು ರಾಹುಲ್‌ ಗಾಂಧಿ ವಿರುದ್ಧದ ಪೂರ್ವಯೋಜಿತ ಪಿತೂರಿಯಾಗಿದೆ; ಬಿಜೆಪಿ, ಆರ್‌ಎಸ್‌ಎಸ್‌ ನವರು ನಡೆಸಿರುವ ಕೊಲೆ ಪಾತಕದ ಕೃತ್ಯ ಇದಾಗಿದೆ’ ಎಂದು ಘಟನೆಯನ್ನು ಖಂಡಿಸಿ ಹಿರಿಯ ಕಾಂಗ್ರೆಸ್‌ ನಾಯಕ ಹಾಗೂ ರಾಜ್ಯಸಭೆಯಲ್ಲಿ ವಿಪಕ್ಷ ನಾಯಕರಾಗಿರುವ ಗುಲಾಂ ನಬೀ ಆಜಾದ್‌ ಹೇಳಿದರು.