ದಯಾಮರಣಕ್ಕೆ ಅರ್ಜಿ ಸಲ್ಲಿಸಲು ಯತ್ನ: ತಾಯಿ ಮಡಿಲಲ್ಲೇ ಅಸುನೀಗಿದ ಮಗ!

Team Udayavani, Jun 2, 2021, 8:15 AM IST

ತಿರುಪತಿ: ಅನಾರೋಗ್ಯದಿಂದ ಬಳಲುತ್ತಿರುವ ತನ್ನ 9 ವರ್ಷದ ಮಗುವಿಗೆ ದಯಾಮರಣ ನೀಡುವಂತೆ ಅರ್ಜಿ ಸಲ್ಲಿಸಲು ಮುಂದಾಗಿದ್ದ ತಾಯಿ, ಕೋರ್ಟ್‌ನಿಂದ ಮನೆಗೆ ಹಿಂತಿರುಗುತ್ತಿರುವಾಗಲೇ ಆಕೆಯ ಮಡಿಲಲ್ಲೇ ಮಗು ಅಸುನೀಗಿದೆ.

ಆಂಧ್ರದ ಚಿತ್ತೂರು ಜಿಲ್ಲೆಯಲ್ಲಿ  ಮಂಗಳವಾರ ಈ ಘಟನೆ ನಡೆದಿದೆ. 4 ವರ್ಷಗಳ ಹಿಂದೆ ಅಪಘಾತದಲ್ಲಿ ಹರ್ಷವರ್ಧನ್‌ ಗಾಯಗೊಂಡಿದ್ದ. ಆ ನಂತರ ರಕ್ತಸ್ರಾವದಂಥ ಅಪರೂಪದ ಕಾಯಿಲೆಗೆ ತುತ್ತಾಗಿದ್ದ. ಹಲವು ವೈದ್ಯರ ಬಳಿ ಅಡ್ಡಾಡಿ 4 ಲಕ್ಷ ರೂ.ಗಳವರೆಗೆ ಖರ್ಚು ಮಾಡಿದರೂ ಮಗ ಚೇತರಿಕೆ ಕಾಣಲಿಲ್ಲ. ಹೀಗಾಗಿ, ಕೋರ್ಟ್‌ಗೆ ಅರ್ಜಿ ಸಲ್ಲಿಸಿ ಚಿಕಿತ್ಸೆಗೆ ನೆರವಾಗುವಂತೆ ಅಥವಾ ದಯಾಮರಣಕ್ಕೆ ಅನುಮತಿ ನೀಡುವಂತೆ ಕೋರಲು ತಾಯಿ ಮುಂದಾಗಿದ್ದರು.

ಮಗನನ್ನು ಎತ್ತಿ ಕೊಂಡೇ ಕೋರ್ಟ್‌ಗೆ ಧಾವಿಸಿದ್ದರು ಆದರೆ, ಕೋರ್ಟ್‌ಗೆ ರಜೆ ಇದ್ದ ಕಾರಣ, ಮನೆಗೆ ವಾಪಸಾಗುತ್ತಿದ್ದಾಗ, ತಾಯಿಯ ಮಡಿಲಲ್ಲೇ ಮಗ ಕೊನೆಯುಸಿರೆಳೆದಿದ್ದಾನೆ.

ಇದನ್ನೂ ಓದಿ: ಬದುಕಲಿಲ್ಲ ಸೈಕಲ್‌ ಹುಡುಗಿಯ ತಂದೆ : ಚಿಕಿತ್ಸೆಗಾಗಿ 1200 ಕಿ.ಮೀ ಸೈಕಲ್ ತುಳಿದಿದ್ದ ಬಾಲಕಿ