Indian Army ಮಾಹಿತಿ ಪಾಕ್‌ಗೆ ರವಾನೆ: ವ್ಯಕ್ತಿ ಸೆರೆ

Team Udayavani, Jul 17, 2023, 6:36 AM IST

ಲಕ್ನೋ: ಭಾರತೀಯ ಸೇನಾ ಸಂಸ್ಥೆಗಳ ಕುರಿತು ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್‌ಐಗೆ ಹಲವು ಸೂಕ್ಷ್ಮ ಮಾಹಿತಿಗಳನ್ನು ರವಾನಿಸಿರುವ ಶಂಕೆಯ ಮೇರೆಗೆ ವ್ಯಕ್ತಿಯೊಬ್ಬನನ್ನು ಉತ್ತರ ಪ್ರದೇಶದ ಭಯೋತ್ಪಾದನಾ ನಿಗ್ರಹ ಪಡೆ (ಎಟಿಎಸ್‌) ಅಧಿಕಾರಿಗಳು ಬಂಧಿಸಿದ್ದಾರೆ.

ಬಂಧಿತನನ್ನು ಗೋಂಡಾದ ನಿವಾಸಿ ರಯೀಸ್‌ ಎಂದು ಗುರುತಿಸಲಾಗಿದ್ದು, ಎಟಿಎಸ್‌ ಕೇಂದ್ರ ಕಚೇರಿಯಲ್ಲಿ ಆತನನ್ನು ವಿಚಾರಣೆ ನಡೆಸಲಾಗಿದೆ. ಈ ವೇಳೆ ತಾನು ಐಎಸ್‌ಐನ ಬೇಹುಗಾರಿಕೆಯ ಭಾಗವಾಗಿ ಕಾರ್ಯನಿರ್ವಹಿಸಿರುವುದಾಗಿ ಒಪ್ಪಿಕೊಂಡಿದ್ದಾನೆ.

ಅಲ್ಲದೇ, ಮುಂಬೈನಲ್ಲಿರುವ ಅಮ್ರಾನ್‌ ಎಂಬಾತನ ಮೂಲಕ ರಯೀಸ್‌ ಐಎಸ್‌ಐ ಸಂಪರ್ಕ ಹೊಂದಿದ್ದು, ಭಾರತದ ವಿರುದ್ಧ ಷಡ್ಯಂತ್ರಕ್ಕೆ ಬೇಹುಗಾರಿಕೆಗೆ ಆತನೇ ರಯೀಸ್‌ನ ಮನವೊಲಿಸಿದ್ದಾನೆ. ಜತೆಗೆ ಪಾಕಿಸ್ತಾನದ ವ್ಯಕ್ತಿಯೊಬ್ಬರ ಮೂಲಕ ದುಬೈನಲ್ಲಿ ಕೆಲಸ ಕೊಡಿಸುವುದಾಗಿಯೂ ಭರವಸೆ ನೀಡಿದ್ದಾನೆಂದು ಡಿಜಿ ಪ್ರಶಾಂತ್‌ ಕುಮಾರ್‌ ತಿಳಿಸಿದ್ದಾರೆ.

2022ರಲ್ಲಿ ರಯೀಸ್‌ಗೆ ವಾಟ್ಸ್‌ಆ್ಯಪ್‌ ಮೂಲಕ ಅಂತಾರಾಷ್ಟ್ರೀಯ ಕರೆಯೊಂದು ಬಂದಿದ್ದು, ಆ ಮೂಲಕ ಹುಸೈನ್‌ ಎಂಬಾತನನ್ನು ಭೇಟಿಯಾಗಲು, ಮಿಲಿಟರಿ ನೆಲೆಗಳ ಫೋಟೋ ಕಳಿಸಲು ಕೇಳಲಾಗಿದೆ. ಈ ಕೃತ್ಯದಲ್ಲಿ ಇನ್ನಿಬ್ಬರು ಭಾಗಿಯಾಗಿದ್ದಾರೆ, ಈ ಕಾರ್ಯಕ್ಕಾಗಿ ರಯೀಸ್‌ಗೆ 15 ಸಾವಿರ ರೂ. ನೀಡಲಾಗಿದ್ದು, ಆತ ಬಾಂಗ್ಲಾ ನೋಂದಣಿ ಇರುವ ನಂಬರ್‌ ಮೂಲಕ ಐಎಸ್‌ಐ ಜತೆಗೆ ಸಂಪರ್ಕದಲ್ಲಿದ್ದ ಎಂದು ಹೇಳಿದ್ದಾರೆ.