ರಾಯ್ಪುರದಲ್ಲಿ ಸೆ.10-12ರ ವರೆಗೆ ಆರ್‌ಎಸ್‌ ಸಮನ್ವಯ ಸಭೆ

Team Udayavani, Sep 1, 2022, 7:24 PM IST

ನಾಗ್ಪುರ:  ಆರ್‌ಎಸ್‌ಎಸ್‌ನ ಅಖಿಲ ಭಾರತೀಯ ಸಮನ್ವಯ ಸಭೆ ಸೆ.10-12ರವರೆಗೆ ಛತ್ತೀಸ್‌ಗಢದ ರಾಜಧಾನಿ ರಾಯ್ಪುರದಲ್ಲಿ ನಡೆಯಲಿದೆ. ಅದರಲ್ಲಿ ಸಂಘಟನೆಯ ವಿವಿಧ ವಿಭಾಗಗಳು ಭಾಗವಹಿಸಲಿವೆ ಎಂದು  ವಕ್ತಾರ ಸುನಿಲ್‌ ಅಂಬೇಕರ್‌ ಅವರು ತಿಳಿಸಿದ್ದಾರೆ.

ಬಿಜೆಪಿ ಅಧ್ಯಕ್ಷ ಜೆ.ಪಿ.ನಡ್ಡಾ, ಪಕ್ಷದ ಸಂಘಟನಾ ಕಾರ್ಯದರ್ಶಿ ಬಿ.ಎಲ್‌.ಸಂತೋಷ್‌, ಆರ್‌ಎಸ್‌ಎಸ್‌ ಪ್ರಧಾನ ಕಾರ್ಯದರ್ಶಿ ದತ್ತಾತ್ರೇಯ ಹೊಸಬಾಳೆ ಸೇರಿದಂತೆ ಪ್ರಮುಖರು ಭಾಗವಹಿಸಲಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.

ದೇಶದ ಆರ್ಥಿಕ, ಸಾಮಾಜಿಕ, ಪರಿಸರ, ಕೌಟುಂಬಿಕ ಮೌಲ್ಯಗಳನ್ನು ಜಾಗೃತಗೊಳಿಸುವ ವಿಚಾರಗಳ ಬಗ್ಗೆ ಚರ್ಚೆ ನಡೆಸಲಾಗುತ್ತದೆ ಎಂದು ಅಂಬೇಕರ್‌ ಹೇಳಿದ್ದಾರೆ.

ಭಾರತೀಯ ಮಜ್ದೂರ್‌ ಸಂಘ, ವಿಶ್ವ ಹಿಂದೂ ಪರಿಷತ್‌, ಅಖೀಲ ಭಾರತೀಯ ವಿದ್ಯಾರ್ಥಿ ಪರಿಷತ್‌, ಭಾರತೀಯ ಕಿಸಾನ್‌ ಸಂಘ, ವಿದ್ಯಾ ಭಾರತಿ ಸಂಘಟನೆಗಳ ಮುಖ್ಯ ಪದಾಧಿಕಾರಿಗಳು ಸಭೆಯಲ್ಲಿ ಭಾಗವಹಿಸಲಿದ್ದಾರೆ. ವರ್ಷಕ್ಕೆ ಒಂದು ಬಾರಿ ಈ ಸಭೆ ನಡೆಯಲಿದೆ ಎಂದರು.

ಆರ್‌ಎಸ್‌ಎಸ್‌ ಹೊಗಳಿದ ದೀದಿ :

ಬಿಜೆಪಿ ವಿರುದ್ಧ ಸದಾ ಕೆಂಡ ಕಾರುವ ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರು ಗುರುವಾರ ಆರ್‌ಎಸ್‌ಎಸ್‌ನ್ನು ಹೊಗಳಿದ್ದಾರೆ. “ಆರ್‌ಎಸ್‌ಎಸ್‌ ಈ ಮೊದಲು ಅಷ್ಟೊಂದು ಕೆಟ್ಟದ್ದಾಗಿರಲಿಲ್ಲ. ಅವರು ಅಷ್ಟೊಂದು ಕೆಟ್ಟವರೆಂದು ನಾನು ಅಂದುಕೊಳ್ಳುವುದಿಲ್ಲ. ಈಗಲೂ ಬಿಜೆಪಿಗೆ ಬೆಂಬಲಿಸದ ಹಲವು ಒಳ್ಳೆಯ ಜನರು ಆರ್‌ಎಸ್‌ಎಸ್‌ನಲ್ಲಿದ್ದಾರೆ. ಅವರು ಮುಂದೊಂದು ದಿನ ಮೌನ ಮುರಿಯಲಿದ್ದಾರೆ’ ಎಂದು ಮಮತಾ ಹೇಳಿದ್ದಾರೆ. ಈ ವಿಡಿಯೋವನ್ನು ಅವರು ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದಾರೆ.